سەۋل تۇرعىندارىنىڭ سانى 30 جىل ٸشٸندە العاش رەت 10 ميلليون ادامنان ازايدى. بۇل تۋرالى سەرسەنبٸ كٷنٸ قالا ٷكٸمەتٸ مەلٸمدەدٸ, دەپ حابارلايدى YONHAP اگەنتتٸگٸ.
استانا تۇرعىندارىنىڭ جالپى سانى بىلتىرعى جىلدىڭ سوڭىندا 9 911 088 ادام بولعان, ونىڭ 9 668 465-ٸ ەل ازاماتى بولسا, 242 623-ٸ - شەتەلدٸك, دەپ حابارلادى جەرگٸلٸكتٸ ٷكٸمەت ٸشكٸ ٸستەر جەنە ەدٸلەت مينيسترلٸكتەرٸنٸڭ دەرەگٸنە سٸلتەمە جاساپ.
1988 جىلى سەۋل تۇرعىندارىنىڭ سانى 10 ميلليوننان اسقان بولاتىن, سودان بەرٸ العاش رەت بۇل كٶرسەتكٸشتەن تٶمەندەپ وتىر.
جەرگٸلٸكتٸ ٷكٸمەتتٸڭ حابارلاۋىنشا, وڭتٷستٸك كورەيا استاناسىندا سول جىلى 10,29 ميلليون ادام تۇردى, 1992 جىلى ەڭ جوعارى كٶرسەتكٸش – 10,97 ميلليون تۇرعىن تٸركەلدٸ.
بىلتىر سەۋل تۇرعىندارىنىڭ سانى 2019 جىلمەن سالىستىرعاندا 99 895 ادامعا نەمەسە 1 پايىزعا كەمٸدٸ, ونىڭ ٸشٸندە وڭتٷستٸك كورەيا تۇرعىندارى 60 642 بولسا, شەتەل ازاماتتارىنىڭ سانى – 39 253 ادام.
سەۋلدٸڭ دەموگرافييا ٷردٸسٸنەن قارتايىپ بارا جاتقان قوعامدى بايقاۋعا بولادى.
بىلتىر 0-4 جاس ارالىعىنداعى سەۋل تۇرعىندارىنىڭ سانى بٸردەن 10,26 پايىزعا ازايىپ كەتتٸ, ال 85-89 جاس ارالىعىنداعى تۇرعىندار سانى كەرٸسٸنشە 11,42 پايىزعا ارتتى.
ايتا كەتكەن جٶن, سەۋل تۇرعىندارىنىڭ ورتاشا جاسى 42,7-دەن 43,2-گە كٶتەرٸلدٸ.
