بٷگٸن پرەمەر-مينيستردٸڭ ورىنباسارى ەرالى توعجانوۆتىڭ تٶراعالىعىمەن قازاقستان رەسپۋبليكاسىنىڭ اۋماعىندا كوروناۆيرۋس ينفەكتسيياسى تارالۋىنىڭ الدىن الۋ جٶنٸندەگٸ ۆەدومستۆوارالىق كوميسسييانىڭ وتىرىسى ٶتتٸ, دەپ حابارلايدى "ۇلت اقپارات" primeminister.kz سايتىنا سٸلتەمە جاساپ.
كوميسسييا جۇمىسىنا ورتالىق مەملەكەتتٸك ورگانداردىڭ ٶكٸلدەرٸ, وبلىس ەكٸمدەرٸ جەنە «اتامەكەن» ۇكپ قىزمەتكەرلەرٸ قاتىستى.
"دەنساۋلىق ساقتاۋ مينيسترٸ اجار عينييات ٶز سٶزٸندە ەلٸمٸزدە ماۋسىمنىڭ ورتاسىنان باستاپ كوروناۆيرۋس ينفەكتسيياسىن جۇقتىرعاندار سانى ارتقانىن اتاپ ٶتتٸ. مەسەلەن, ٶتكەن اپتامەن سالىستىرعاندا جۇقتىرۋ جاعدايلارى 2,9 ەسە ارتقان, ناۋقاستاردىڭ 80 پايىزىنا جۋىعى – ٸندەتكە قارسى ەكپە الماعاندار جەنە سوڭعى ەكپەدەن كەيٸن 6 اي ٶتٸپ كەتكەن ادامدار", - دەلٸنگەن حابارلامادا.
ەلدەگٸ COVID-19 كٶرسەتكٸشتەرٸنٸڭ ارتۋىن ەسكەرە وتىرىپ, قازاقستان اۋماعىندا كوروناۆيرۋس ينفەكتسيياسىنىڭ تارالۋىنا جول بەرمەۋ جٶنٸندەگٸ ۆەدومستۆوارالىق كوميسسييا ٶڭٸرلەر ەپيدەميولوگييالىق قاۋٸپ-قاتەردٸڭ سارى ايماعىنا كٶشكەن جاعدايدا تٶمەندەگٸ قوسىمشا شارالاردى قابىلداۋ كەرەك ەكەنٸ تۋرالى شەشٸم قابىلدادى:
- ناۋقاسپەن تىعىز قارىم-قاتىناستا بولعانداردى قاشىقتان جۇمىس ٸستەۋ فورماتىنا كٶشٸرۋ;
- COVID-19-عا قارسى ەكپە سالدىرۋعا بولمايتىن قىزمەتكەرلەر مەن جٷكتٸ ەيەلدەردٸ قاشىقتان جۇمىس ٸستەۋ فورماتىنا اۋىستىرۋ;
- جابىق جەرلەر مەن قوعامدىق كٶلٸكتە مٸندەتتٸ تٷردە ماسكا تاعۋ;
- 10-نان اسا ادام قاتىساتىن جينالىستاردى ونلاين فورماتتا ٶتكٸزۋدٸ ۇسىنۋ.
سونداي-اق, ايماقتىڭ ەپيدەميولوگييالىق احۋالىنا قاراماستان, ەۋەدە, تج كٶلٸكتەرٸ مەن حالىقارالىق اۆتوبۋستاردا ماسكا تاعۋ ۇسىنىلادى.
ەرالى توعجانوۆ وبلىس ەكٸمدەرٸنە كوروناۆيرۋس ينفەكتسيياسىنا قارسى ەگۋ ناۋقانىن كٷشەيتۋدٸ, سىرقاتتانعاندار كٶبەيگەن جاعدايدا كادرلارمەن, دەرٸ-دەرمەك قورى جەنە تٶسەك-ورىندارمەن قامتاماسىز ەتۋدٸ ەرەكشە باقىلاۋعا الۋدى تاپسىردى. سونداي-اق, حالىق اراسىندا ساپالى تٷسٸندٸرۋ جۇمىستارىن كٷشەيتۋ قاجەت ەكەنٸن ەسكەرتتٸ.
