ەۋرووداق كوروناۆيرۋسقا قارسى رەسەيلٸك "سپۋتنيك V" ۆاكتسيناسىن ماقۇلداۋدى كٷزگە, تٸپتٸ جىل سوڭىنا قالدىرادى. بۇل تۋرالى وسى مەسەلەمەن تانىس دەرەككٶزگە سٷيەنگەن Reuters اگەنتتٸگٸ حابارلادى.
اگەنتتٸكتٸڭ جازۋىنشا, رەسەي تارابى بەلگٸلەنگەن مەرزٸم – 10 ماۋسىمعا دەيٸن ۆاكتسينانى كلينيكالىق سىناقتان ٶتكٸزۋ كەزەڭٸندەگٸ قاجەتتٸ دەرەكتەرمەن قامتاماسىز ەتپەگەن. بۇعان دەيٸن بٸرقاتار مامان "قاجەتتٸ دەرەك بەرمەگەنٸ ٷشٸن" نەمەسە "دەرەكتەرمەن شاتىستىرعانى ٷشٸن" "سپۋتنيك" ٶندٸرۋشٸلەرٸن سىناعان.
وسىعان دەيٸن ەۋروپانىڭ دەرٸ-دەرمەك جٶنٸندەگٸ اگەنتتٸگٸ (EMA) مامىر نەمەسە ماۋسىم ايىندا "سپۋتنيكتٸ" وداق اۋماعىندا پايدالانۋعا رۇقسات بەرەدٸ نەمەسە تىيىم سالادى دەگەن بولجام ايتىلعان.
ۆاكتسينانى شەتەلدە تاراتۋمەن اينالىساتىن رەسەيلٸك ينۆەستيتسييالار قورى (رفپي) Reuters اگەنتتٸگٸنٸڭ اقپاراتىن تەرٸستەدٸ.
"پروتسەدۋرا مەرزٸمٸ بويىنشا شەشٸم قابىلداۋ EMA-نىڭ ايرىقشا قۇزىرەتٸ بولعانمەن "سپۋتنيك V" كومانداسى ۆاكتسينانى ەكٸ اي ٸشٸندە تٸركەتەمٸز دەپ ٷمٸتتەنەدٸ" دەلٸنگەن قور مەلٸمدەمەسٸندە.
رپفي سونىمەن بٸرگە اگەنتتٸككە قاجەتتٸ قۇجاتتاردىڭ بارلىعىن ٶتكٸزگەنٸن, ال كلينيكالىق تەجٸريبەنٸ تەكسەرۋ نەتيجەسٸ بويىنشا وڭ پٸكٸر العانىن ايتتى.
قازٸر "سپۋتنيكتٸ" ەۋرووداقتىڭ ەكٸ مەملەكەتٸ: ۆەنگرييا مەن سلوۆاكييا رەسمي تٷردە ماقۇلداعان. بٸراق ۆاكتسينا تۇتاس وداق اۋماعىندا ماقۇلدانباعان. ۆاكتسينانى دٷنيەجٷزٸلٸك دەنساۋلىق ساقتاۋ ۇيىمى دا ەزٸرگە ماقۇلدامادى. سوعان قاراماستان رەسەي تارابى ۆاكتسينانى جەتكٸزۋ بويىنشا ونداعان ەلمەن كەلٸسٸم-شارت جاساسىپ قويعان.
