رەسەيدٸڭ مەدەنيەت مينيسترٸ ولگا ليۋبيموۆا كوروناۆيرۋسقا تەست تاپسىرىپ, مينيستردەن ۆيرۋس بارى انىقتالدى. بۇل تۋرالى مينيستردٸڭ باسپاسٶز حاتشىسىنا سٸلتەمە جاساعان "ريا نوۆوستي" اگەنتتٸگٸ حابارلادى.
باسپاسٶز حاتشىسىنىڭ سٶزٸنە قاراعاندا "اۋرۋ جەڭٸل ٶتٸپ جاتىر, سوندىقتان اۋرۋحاناعا جاتقىزۋ مەسەلەسٸ تۋىنداپ وتىرعان جوق". ليۋبيموۆانىڭ قانشا رەت تەست تاپسىرعانى بەلگٸسٸز. ول ەزٸرگە قاشىقتان جۇمىس ٸستەپ جاتىر.
39 جاستاعى ليۋبيموۆا قاڭتار ايىندا مەدەنيەت مينيسترٸ بولىپ تاعايىندالعان, وعان دەيٸن كينو دامىتۋ ٸسٸمەن شۇعىلدانعان, ونىڭ الدىندا بٸرٸنشٸ ارنادا ٸستەگەن.
ليۋبيموۆا - رەسەي ٷكٸمەتٸ مٷشەلەرٸ اراسىندا كوروناۆيرۋس تابىلعان ٷشٸنشٸ شەنەۋنٸك. بۇعان دەيٸن پرەمەر-مينيستر ميحايل ميشۋستيننەن كوروناۆيرۋس تابىلىپ, ۋاقىتشا دەمالىس العان. قۇرىلىس مينيسترٸ ۆلاديمير ياكۋشەۆكە دە ۆيرۋس جۇققانى انىقتالعان ەدٸ.
ەپيدەمييا تاراعالى بەرٸ رەسەيدە 165 929 ادامنان كوروناۆيرۋس تابىلعان. ەگەر ٸندەت ەرٸ قاراي دا وسىنداي قارقىنمەن جايىلسا, رەسەي بەيسەنبٸ كٷنٸ گەرمانييانى قۋىپ جەتٸپ, كوروناۆيرۋس كٶپ تابىلعان ەلەمدەگٸ العاشى بەس ەلدٸڭ قاتارىنا كٸرەدٸ.
