رەسەي پرەزيدەنتٸ ۆلاديمير پۋتين "روسكوسموس" باسشىسى دميتريي روگوزيندٸ قىزمەتٸنەن بوساتتى. ۆەدومستۆونى ەندٸ بۇرىنعى ۆيتسە-پرەمەر يۋريي بوريسوۆ باسقارادى, دەپ حابارلايدى ازاتتىق.
بوريسوۆتٸڭ ٶزٸ ۆيتسە-پرەمەر قىزمەتٸنەن جۇما كٷنٸ بوساتىلدى. بۇعان دەيٸن قۇپييا دەرەككٶزگە سٷيەنگەن بٸرنەشە رەسەيلٸك باسىلىم كادر الماسۋى بولاتىنىن بولجاعان.
"ۆەدوموست" باسىلىمىنىڭ دەرەككٶزٸنٸڭ ايتۋىنشا, روگوزين دونباستى باسقارۋعا جٸبەرٸلۋٸ مٷمكٸن. "مەدۋزا" سايتى ول پرەزيدەنت ەكٸمشٸلٸگٸنٸڭ جەتەكشٸسٸ قىزمەتٸنە تاعايىندالىپ, دونباستى قولعا الادى دەپ جازعان. "موسكوۆسكيي كومسومولەتس" باسىلىمى دەرەككٶزگە سٷيەنبەي, شەنەۋنٸك ۋكراينا اۋماعىنداعى رەسەي كٷشتەرٸ نەمەسە سەپاراتيستەر شوعىرلانعان ايماقتا جوعارى لاۋازىمدى شەنگە يە بولادى دەپ جازعان.
روگوزين "روسكوسموستى" 2018 جىلدان بەرٸ باسقارعان. وعان دەيٸن ۆيتسە-پرەمەر بولعان. ونىڭ باسشىلىعى تۇسىندا مەملەكەتتٸك كورپوراتسييا عارىشقا كوممەرتسييالىق ۇشىرۋلار نارىعىنداعى ەدەۋٸر ٷلەسٸنەن ايىرىلدى, عارىشكەرلەردٸ وربيتاعا جەتكٸزۋ سالاسى بويىنشا مونوپوليست بولۋدان قالدى. سوعىس باستالعاننان كەيٸن مەكەمە ەۋروپا عارىش اگەنتتٸگٸمەن ەرٸپتەستٸگٸن توقتاتتى.
65 جاستاعى يۋريي بوريسوۆ 2018 جىلى روگوزيننٸڭ ورنىنا ۆيتسە-پرەمەر بولىپ تاعايىندالعان. ول "روسكوسموستاعى" قورعانىس ٶنەركەسٸبٸنە دە جەتەكشٸلٸك ەتكەن. 20 جىل رەسەي ارميياسىندا قىزمەت ەتكەن.
2018 جىلى "كوممەرسانت" باسىلىمى تەحنيكا عىلىمىنىڭ دوكتورى بوريسوۆقا پرەزيدەنتتٸڭ جابىق جارلىعىمەن رەسەي باتىرى اتاعى بەرٸلگەنٸن جازعان. اقپاراتقا قاراعاندا, ول پۋتين فەدەرالدىق جيىنىندا تانىستىرعان ستراتەگييالىق جاڭا قارۋ تٷرٸن جاساعانى ٷشٸن ماراپاتتالعان.
