قر پرەزيدەنتٸ قاسىم-جومارت توقاەۆ سىرتقى ٸستەر مينيسترلٸگٸنٸڭ كەڭەيتٸلگەن القا مەجٸلٸسٸندە سالاداعى بٸلٸكتٸ مامانداردىڭ ۆەدومستۆودان كەتۋٸنە الاڭداۋشىلىق بٸلدٸردٸ, دەپ حابارلايدى قازاقپارات.
«بەسٸنشٸ مەسەلە – قازاقستان ديپلوماتيياسىنىڭ جاڭا كەلبەتٸن قالىپتاستىرۋ. بٸزدٸڭ ديپلوماتييالىق قىزمەتكە تىڭ سەرپٸلٸس قاجەت. بٸلٸكتٸ مامانداردىڭ سىرتقى ٸستەر مينيسترلٸگٸنەن كەتۋٸ ونىڭ كادرلىق ەلەۋەتٸن ەلسٸرەتۋدە. بۇل – شىن مەنٸندە, ٶزەكتٸ مەسەلە.
مەن وسى مينيسترلٸك ەڭ كونسەرۆاتيۆتٸ قۇرىلىمنىڭ بٸرٸ ەكەنٸن بٸلەمٸن. مۇنىڭ جاقسى جاعى دا بار. دەستٷر ساقتالادى, كەسٸبي ديپلوماتتار شوعىرى قالىپتاسادى. دەگەنمەن, جاعىمسىز جاعى دا جوق ەمەس», - دەگەن پرەزيدەنت بٸلٸمدٸ, بٸلٸكتٸ ەرٸ ەلگە ادال قىزمەت ەتكٸسٸ كەلەتٸن جاستار ٷشٸن مينيسترلٸككە جۇمىسقا تۇرۋ – «الىنباس قامالداي» ەكەنٸن اتادى.
ايتۋىنشا, احۋالدى تٷزەپ, كادر ساياساتىن تٷبەگەيلٸ قايتا قارايتىن كەز كەلدٸ.
«ديپلوماتييالىق قىزمەتكە, ەڭ الدىمەن, كٶزٸ اشىق, كٶكٸرەگٸ وياۋ, وتانشىل ماماندار قاجەت. قازاقستان اتىنان شەت مەملەكەتتەردە قىزمەت ٸستەپ جٷرگەن ديپلوماتتارىمىز شەتەل تٸلدەرٸن عانا ەمەس, الدىمەن مەملەكەتتٸك تٸلدٸ بٸلۋٸ كەرەك.
سٶز سوڭىندا تاعى دا قايتالاپ ايتامىن: قازاقستاننىڭ سىرتقى ساياساتىنداعى نەگٸزگٸ باعىتتاردى جٷزەگە اسىرۋ ٷشٸن تيٸستٸ جۇمىستى تىڭ قارقىنمەن جالعاستىرۋ كەرەك. ياعني, ۋاقىت سىنىنان ٶتكەن ۇستانىمداردى جاڭا شەشٸمدەرمەن ۇشتاستىرۋ قاجەت. وسى ورايدا, ديپلوماتتارىمىز قاشاندا ەل مٷددەسٸنە ادال بولادى دەپ سەنەمٸن», - دەدٸ مەملەكەت باسشىسى.
