قازاقستان پرەزيدەنتٸنٸڭ باسپاسٶز حاتشىسى ايدوس ٷكٸباي قازاقپارات تٸلشٸسٸنە بەلگٸلٸ سپورتشى دەنيس تەننٸڭ قازاسىن ەلباسىنىڭ قالاي قابىلداعانى تۋرالى ايتىپ بەردٸ.
ونىڭ ايتۋىنشا, نۇرسۇلتان نازارباەۆ دەرەۋ باس پروكۋرور مەن ٸشكٸ ٸستەر مينيسترٸنە سپورتشىنىڭ قازاسى تۋرالى قىلمىستىق ٸستٸ ەرەكشە باقىلاۋعا الۋدى تاپسىرعان بولاتىن.
«مەملەكەت باسشىسى جاس ەرٸ تالانتتى, قازاقستان مەن ەلەمنٸڭ سٷيٸسپەنشٸلٸگٸنە بٶلەنٸپ ٷلگەرگەن, بولاشاعىنان زور ٷمٸت كٷتتٸرگەن دەنيس تەننٸڭ باقيلىق بولۋىن اۋىر قايعىمەن جەنە زور كٷيزەلٸسپەن قابىلدادى. پرەزيدەنت قازاقستاندا مەنەرلەپ سىرعاناۋدىڭ نەگٸزٸن قالاعان جەنە ەلٸمٸزدەگٸ سپورتتىڭ دامۋىنا زور ٷلەس قوسقان دەنيستٸڭ جاقىندارى مەن تۋىستارىنا كٶڭٸل ايتۋ جەدەلحاتىن جٸبەردٸ», - دەدٸ ايدوس ٷكٸباي.
سونىمەن بٸرگە, نۇرسۇلتان نازارباەۆ جاستارعا ٷلگٸ بولا بٸلگەن تاماشا ۇلدى, ٶز ەلٸنٸڭ ناعىز پاتريوتىن تەربيەلەپ ٶسٸرگەن دەنيس تەننٸڭ اتا-اناسىنا قوڭىراۋ شالىپ, كٶڭٸل ايتقان.
«مەملەكەت باسشىسى دەنيستٸڭ مەزگٸلسٸز دٷنيەدەن ٶتۋٸ - جاقىندارى مەن تۋىستارى ٷشٸن عانا ەمەس, تۇتاس مەملەكەت ٷشٸن ورنى تولماس قازا ەكەنٸن جەتكٸزدٸ. مەنەرلەپ سىرعاناۋشىنىڭ اتا-اناسىنا كٶڭٸل ايتا وتىرىپ, پرەزيدەنت قىلمىسكەرلەردٸڭ جازاسىز قالمايتىنىن باسا ايتتى», - دەدٸ ەلباسىنىڭ باسپاسٶز حاتشىسى ايدوس ٷكٸباي.
ايتا كەتسەك, قازاقستاندىق مەنەرلەپ سىرعاناۋشى دەنيس تەن 19 شٸلدە كٷنٸ پىشاق جاراقاتىنان قازا بولعان ەدٸ. وقيعا قۇرمانعازى بايسەيٸتوۆا كٶشەلەرٸنٸڭ قيىلىسىندا 19 شٸلدەدە تٷسكٸ ساعات 15:00 شاماسىندا بولعان. سپورتشى كٶلٸگٸنٸڭ ايناسىن ۇرلاماق بولعان ەكٸ ادامنىڭ ٷستٸنەن تٷسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنا جاراقات الدى. 25 جاستاعى تەن ٷش ليتر قان جوعالتىپ, اۋرۋحاناعا ٶتە اۋىر جاعدايدا جەتكٸزٸلدٸ. بٸراق الماتى قالالىق دەنساۋلىق ساقتاۋ باسقارماسىنىڭ باسشىسى سەرٸكبول مۋسينوۆ قوسىمشا قان قاجەت ەمەستٸگٸن جەنە رەسۋرستار جەتكٸلٸكتٸ ەكەندٸگٸن مەلٸم ەتكەن بولاتىن. 2,5 ساعاتقا جالعاسقان رەانيماتسييالىق شارالارعا قاراماستان, اۋرۋحانا دەرٸگەرلەرٸ ونىڭ ٶمٸرٸنە اراشا تٷسە المادى. ساعات 17.30-دا وليمپيادا جٷلدەگەرٸ قايتىس بولدى.
ادام ٶلتٸرۋ بابىمەن قىلمىستىق ٸس قوزعالدى. بٷگٸن بەلگٸلٸ بولعانداي, سپورتشىنىڭ ٶلٸمٸنە قاتىسى بار ەكٸ كٷدٸكتٸنٸڭ بٸرٸ ۇستالىپ, ول قىلمىسىن مويىندادى. ەكٸنشٸ كٷدٸكتٸ - 1994 جىلى تۋعان قىزىلوردا وبلىسى, قارماقشى اۋدانى, اقاي اۋىلىنىڭ تۋماسى ارمان قۇدايبەرگەنوۆكە ٸزدەۋ جارييالاندى.
.jpeg)