فوتو: Polisia.kz
پەتروپاۆل قالاسىندا ينتەرنەت-الاياقتىققا قارسى كٷرەستە ەنگٸزٸلگەن جاڭا الگوريتم تيٸمدٸلٸگٸن دەلەلدەدٸ. بٸر اپتا ٸشٸندە پوليتسييا مەن جەكەمەنشٸك كٷزەت قىزمەتكەرلەرٸ زەينەتكەرلەردٸڭ قاراجاتىن ۇرلاماق بولعان بٸرنەشە ەرەكەتتٸڭ الدىن الىپ, جالپى سوماسى 7 ميلليون تەڭگەدەن استام قاراجاتتى ساقتاپ قالدى, دەپ حابارلايدى Ult.kz.
جاڭا تەسٸل سولتٷستٸك قازاقستان وبلىسى پوليتسييا دەپارتامەنتٸ باسشىلىعىنىڭ باستاماسىمەن ەنگٸزٸلگەن. ەندٸ قالاداعى ساۋدا جەنە ويىن-ساۋىق ورتالىقتارىندا كەزەكشٸلٸك اتقاراتىن پوليتسييا مەن كٷزەت قىزمەتكەرلەرٸ بانكومات ماڭىنداعى جاعدايدى باقىلاپ, ەسٸرەسە تەلەفون ارقىلى سٶيلەسٸپ, الاڭداۋلى كٷيدە اقشا اۋدارۋعا تىرىسىپ جاتقان ەگدە جاستاعى ادامدارعا ەرەكشە نازار اۋدارادى.
الاياقتىقتىڭ كەڭ تارالعان سحەمالارىنىڭ بٸرٸ – «سٸزدٸڭ اتىڭىزعا نەسيە رەسٸمدەلدٸ», نەمەسە «اناشىم, مەن جول اپاتىنا تٷستٸم» دەگەن جەلەۋمەن زەينەتكەرلەردٸ قورقىتىپ, اقشا اۋدارتۋعا يتەرمەلەۋ. مىسالى, ساۋدا ورتالىقتارىنىڭ بٸرٸندە پوليتسييا قىزمەتكەرٸ بانكومات جانىنداعى 74 جاستاعى ەيەلدٸڭ قيمىلىنان كٷدٸك بايقاپ, ارالاسادى. زەينەتكەرگە ٶزٸن بانك قىزمەتكەرٸ رەتٸندە تانىستىرعان ادام حابارلاسىپ, اتىنان نەسيە رەسٸمدەلگەنٸن ايتىپ, ونى توقتاتۋ ٷشٸن اقشانى «قاۋٸپسٸز» شوتقا اۋدارۋدى تالاپ ەتكەن. ۋاقتىلى ارالاسۋدىڭ ارقاسىندا 500 مىڭ تەڭگە الاياقتاردىڭ قولىنا تٷسپەي قالدى.
دەل وسىنداي وقيعا 75 جاستاعى تاعى بٸر تۇرعىننىڭ باسىنان ٶتكەن. بەلگٸسٸز بٸرەۋ ٶزٸن ۇلى, كەيٸن نەمەرەسٸ رەتٸندە تانىستىرىپ, شۇعىل اقشا كەرەكتٸگٸن ايتقان. كٷزەتشٸ جاعدايدى دەر كەزٸندە بايقاپ, پوليتسييا شاقىرعان. تەرتٸپ ساقشىلارى كەلگەنشە زەينەتكەر بانكومات ارقىلى اقشا اۋدارۋعا ەرەكەتتەنٸپ جاتقان.
ٷشٸنشٸ جاعدايدا ەگدە جاستاعى ەرلٸ-زايىپتى ازاماتتار 6 ميلليون تەڭگەدەن ايىرىلىپ قالا جازدادى. ولارعا دا نەسيە رەسٸمدەلدٸ دەگەن حابارلاما كەلٸپ, تەلەفون ارقىلى سەندٸرٸلگەنٸ سونشالىق – زەينەتكەرلەر باستاپقىدا تٸپتٸ پوليتسيياعا سەنبەگەن. ولار 1,5 ميلليون تەڭگەنٸ اۋدارىپ ٷلگەرگەنٸمەن, پوليتسەيلەردٸڭ تٷسٸندٸرۋ جۇمىسى نەتيجەسٸندە قالعان 4,5 ميلليون تەڭگە امان قالدى.
جىل باسىنان بەرٸ سولتٷستٸك قازاقستان وبلىسىندا 270-تەن استام ينتەرنەت-الاياقتىق دەرەگٸ تٸركەلگەن, بۇل ٶڭٸردەگٸ بارلىق قىلمىستىڭ تٶرتتەن بٸرٸنە جۋىعىن قۇرايدى.
سقو پد باستىعىنىڭ بٸرٸنشٸ ورىنباسارى اسقار مۇحامەتقاليەۆتٸڭ ايتۋىنشا, ەنگٸزٸلگەن الگوريتم تيٸمدٸ نەتيجە كٶرسەتۋدە. الداعى ۋاقىتتا بۇل ەدٸستٸ جەتٸلدٸرۋ, كەڭەيتۋ جەنە ازاماتتاردى قورعاۋدا ەرەكشە كٶزگە تٷسكەن قىزمەتكەرلەردٸ ىنتالاندىرۋ جوسپارلانىپ وتىر.
پوليتسييا تۇرعىندارعا ەسكەرتۋ جاسايدى: جاسى ٷلكەن تۋىستارىڭىز, كٶرشٸلەرٸڭٸز نەمەسە تانىستارىڭىز بانكوماتقا بارعاندا جالعىز بولماۋىن قاداعالاڭىزدار. ولارعا الاياقتاردىڭ جيٸ قولداناتىن ەدٸستەرٸن تٷسٸندٸرٸپ, ساقتىققا شاقىرىڭىزدار. ەڭ ماڭىزدىسى – اسىقپاي, ٷزٸلٸس جاساپ, اقپاراتتى ناقتىلاۋ ٷشٸن تۋىستارىڭىزعا, بانككە نەمەسە بٸردەن «102» نٶمٸرٸنە قوڭىراۋ شالۋ قاجەت.
