فوتو: elements.envato.com
پاۆلودارلىق ەيەل وتباسىن باقىتتى ەتۋ ٷشٸن تەۋٸپكە 119,5 ميلليون تەڭگە بەرگەن. الاياقتىق فاكتٸسٸ بويىنشا قىلمىستىق ٸس پاۆلوداردىڭ 2-نشٸ سوتىندا قارالدى, دەپ حابارلادى Sputnik قازاقستان وبلىستىق سوتتىڭ باسپاسٶز قىزمەتٸنە سٸلتەمە جاساپ.
سوتتالۋشى ەيەل بويىندا دەستٷرلٸ ەمەس جولمەن ەمدەيتٸن تىلسىم كٷش بارىنا سەندٸرٸپ, 2019 جىلدىڭ ناۋرىزىنان 2020 جىلدىڭ تامىز ايى ارالىعىندا جەبٸرلەنۋشٸنٸڭ 119 ميلليون 480 مىڭ تەڭگە اقشاسىن يەمدەنٸپ العان. بۇل اقشاعا الاياق تەۋٸپ وككۋلتيزم سالاسىندا ارنايى رەسٸمدەر ٶتكٸزٸپ, جەبٸرلەنۋشٸنٸڭ وتباسىن باقىتتى, بيزنەسٸن باقۋاتتى "ەتكەن".
پروكۋرور سوتتالۋشىنى بەس جىلعا باس بوستاندىعىنان ايىرۋدى سۇرادى. پروكۋروردىڭ بۇل شەشٸمٸمەن جەبٸرلەنۋشٸ دە كەلٸسكەن. الايدا الاياق تەۋٸپ ٶز كٸنەسٸن مويىنداماي, سوتتان كەرٸسٸنشە اقتاپ الۋدى ٶتٸنگەن. مۇنداي قىلمىس ٷشٸن زاڭدا 5 جىلدان 10 جىلعا دەيٸن باس بوستاندىعىنان ايىرۋ جازاسى قاراستىرىلعان.
سوت الاياق تەۋٸپتٸ بەس جىلعا باس بوستاندىعىنان ايىرۋ تۋرالى ٷكٸم شىعاردى. الايدا سوتتالۋشىنىڭ بۇرىن سوتتالماعانىن, ٷش بالاسى بارىن ەسكەرٸپ, تاعايىندالعان جازانى 5 جىلعا, ياعني 2028 جىلدىڭ 9 اقپانىنا دەيٸن كەيٸنگە قالدىرىلدى.
سونداي-اق سوتتالۋشىدان جەبٸرلەنۋشٸنٸڭ پايداسىنا 119 ميلليون 480 مىڭ تەڭگە كٶلەمٸندەگٸ زالال ٶندٸرٸلدٸ.
ٷكٸم زاڭدى كٷشٸنە ەنگەن جوق.
