ۇلتتىق نەيروحيرۋرگييا ورتالىعى ٷكٸمەتتەن پاركينسون اۋرۋىن ۋلترادىبىسپەن ەمدەيتٸن جاڭا اپپارات ساتىپ الۋعا قاراجات سۇراپ وتىر. بۇل تۋرالى ورتالىقتىڭ باسقارما تٶراعاسى سەرٸك اقشولاقوۆ مەلٸم ەتتٸ, دەپ حابارلايدى قازاقپارات.
«مەديتسينا سالاسى بٸر ورنىندا تۇرمايدى. بٷگٸنگٸ جاقسى زاماناۋي تەحنولوگييا بٸر جىلدان كەيٸن وزىق تەحنولوگييا بولماي قالۋى مٷمكٸن. سوندىقتان ٷكٸمەتكە ٶز ۇسىنىستارىمىزدى بەرٸپ وتىرامىز. سونىڭ ارقاسىندا بٸزدٸڭ ورتالىقتىڭ تەحنولوگيياسى ەۋروپانىڭ كلينيكالارىنان قالىسپايدى. قازٸر فۋنكتسيونالدىق اۋرالاردى, پاركينسون اۋرۋىن ۋلترادىبىسپەن ەمدەيتٸن جاڭا اپپاراتتار شىعىپ جاتىر. ول تۋرالى مەن ٷكٸمەتتە سٶز قوزعادىم. قولداۋ تاپتى دەپ ايتا الام. ول قولداۋدىڭ ٸسكە اسۋى ٷشٸن ۋاقىت كەرەك. ول جاعىنان تولىق قولداۋ بار», - دەدٸ نەيروحيرۋرگ ەلوردادا ٶتٸپ جاتقان حالىقارالىق فورۋمنىڭ كۋلۋارىندا.
ايتۋىنشا, ول باسقاراتىن مەكەمە 14 جىلدا 35 مىڭ كٷردەلٸ وتا جاساعان. سونىڭ ارقاسىندا بۇرىن تەك شەتەلدە ەمدەلەتٸن ناۋقاستار قازاقستاندا اۋرۋىن ەڭسەرۋگە مٷمكٸندٸك العان.
«ۇلتتىق نەيروحيرۋرگييا ورتالىعى جۇمىسىن باستاعان 14 جىلدىڭ ٸشٸندە 35 مىڭداي وتا جاسادىق. سونىڭ 95 پايىزى حالىق ٷشٸن تەگٸن جاسالدى. ياعني, قازاقستاندىقتار ٷشٸن تولىعىمەن تەگٸن, كۆوتا ارقىلى ٸستەلەدٸ. قازٸر بٸزگە شەتەلدەن دە كەلەتٸن ەمدەلۋشٸلەر بار. مەديتسينالىق ساقتاندىرۋ ارقىلى وتا جاساتۋشىلار دا بار. سولاردىڭ ٸشٸندە ەڭ قىمباتى –مي قانتامىرلارىنا جاسالاتىن وتا. ونىڭ قۇنىن دا قازاقستاندىقتار ٷشٸن مەملەكەت تٶلەيدٸ», - دەدٸ سەرٸك اقشولاقوۆ.
