قر ەكولوگييا, گەولوگييا جەنە تابيعي رەسۋرستار مينيسترٸ ماعزۇم مىرزاعاليەۆ ورمان شارۋاشىلىعى قىزمەتكەرلەرٸن كەسٸبي مەرەكەسٸمەن قۇتتىقتادى. جىل سايىن قازان ايىنىڭ ٷشٸنشٸ جەكسەنبٸسٸندە اتاپ ٶتٸلەتٸن كٷن بيىل 18 قازانعا تۋرا كەلٸپ وتىر, دەپ حابارلايدى "ۇلت اقپارات".
«قيىندىعى مەن سان-تٷرلٸ تەۋەكەلدەرٸنە قاراماستان, ەلٸمٸزدٸڭ ورمان قورىن ساقتاپ, جاڭعىرتۋ تاباندى ەڭبەك ەتٸپ كەلە جاتقان ازاماتتار قانداي قۇرمەتكە دە لايىق. سەبەبٸ ورمان كەشەنٸ - ەكولوگييالىق قاۋٸپسٸزدٸكتٸڭ كەپٸلٸ»,- دەپ جازدى ول Twitter پاراقشاسىندا.
مينيستر قازٸر ورمانشىلار مەرتەبەسٸن كٶتەرۋ مەسەلەسٸ قارالىپ جاتقانىنان حاباردار ەتتٸ.
«ورمانشىلار - باعا جەتپەس ۇلتتىق بايلىعىمىزدى قورعاپ, كەلەر ۇرپاققا جەتكٸزۋشٸلەر. ولاردىڭ زور ەڭبەگٸن ەسكەرە وتىرىپ, بٸزدٸڭ مينيسترلٸك ورمانشىلار ستاتۋسىن كٶتەرۋ مەسەلەسٸن قاراستىرىپ جاتىر. جاسىل تابيعاتتى ايالاۋ - ەرقايسىمىزدىڭ مٸندەتٸمٸز. سوندىقتان بارلىق ەل ازاماتتارىن ورمان قورىنا ۇقىپتى قاراپ, ونى قورعاۋشىلارعا قولداۋ كٶرسەتۋگە, جۇمىستارىن باعالاۋعا شاقىرامىن»,- دەدٸ ماعزۇم مىرزاعاليەۆ.
ەسكە سالايىق, ورمان شارۋاشىلىعى قىزمەتكەرلەرٸنٸڭ كەسٸبي مەرەكەسٸ 2017 جىلى قر ٷكٸمەتٸ قاۋلىسىمەن بەكٸتٸلگەن.
