ودەسسانىڭ ٸرگەسٸندە رەسەي كٷشتەرٸنٸڭ ەۋە شابۋىلىنان قيراعان ٷي مەن ونداعى ادامداردى ٸزدەپ جٷرگەن قۇتقارۋشىلار. ۋكراينا, 1 شٸلدە 2022 جىل.
ۋكراينا بيلٸگٸ ٶتكەن تٷنٸ ودەسسا قالاسىنىڭ شەتٸندەگٸ تۇرعىن ٷي مەن دەمالىس ورنىن اتقىلاعان رەسەي كٷشتەرٸنٸڭ ەۋە شابۋىلىنان كەمٸندە 18 ادام قازا تاۋىپ, 30-دان استامى جارالانعانىن حابارلادى, دەپ جازادى ازاتتىق.
"1 شٸلدەدە تٷنگٸ ساعات بٸردٸڭ شاماسىندا بەلگورود-دنەستروۆ اۋدانىنداعى قالا تيپتەس كەنتتە زىمىران سوققىسىنان توعىز قابات تۇرعىن ٷي ٸشٸنارا بٷلٸنٸپ, وعان جاپسارلاس سالىنعان دٷكەن ٶرتەندٸ" دەپ حابارلادى ۋكراينانىڭ تٶتەنشە جاعدايلار جٶنٸندەگٸ مەملەكەتتٸك قىزمەتٸ. ەۋە شابۋىلى سالدارىنان 16 ادام مەرت بولىپ, 30-عا جۋىق ادام جارالانعان. قيراعان عيمارات استىندا قالعان جەتٸ ادام (ٷشەۋٸ – بالا) قۇتقارىلعان.
ەكٸنشٸ زىمىران تٷسكەن سول ماڭداعى دەمالىس ورنىنان كەيٸنٸرەك تاعى بٸر ەرەسەك ادام مەن بٸر بالا ٶلٸ تابىلعان. زىمىراندار تٷسكەن جەردە قۇتقارۋشىلار جۇمىس ٸستەپ جاتىر.
ۋكراينانىڭ "وڭتٷستٸك" باسشىلىعىنىڭ حابارلاۋىنشا, كٶپقاباتتى تۇرعىن ٷي مەن دەمالىس ورنىن رەسەيدٸڭ تۋ-22 ستراتەگييالىق بومبالاۋشى ۇشاعى ٷش ح-22 زىمىرانىمەن اتقان.
رەسەي قورعانىس مينيسترلٸگٸ ودەسسا ماڭىنا جاسالعان بۇل ەۋە شابۋىلى تۋرالى ەزٸرگە ەشتەڭە ايتپادى.
وسى وقيعانىڭ قارساڭىندا بۇۇ ۋكرايناداعى سوعىستا قازا تاپقان بەيبٸت ادامدار تۋرالى بايانداماسىن جارييالاعان. رەسەي ۋكرايناعا باسىپ كٸرگەن 24 اقپاننان بەرٸ بۇۇ ساراپشىلارى ۋكراينانىڭ 30-دان استام قالاسىندا 3924 بەيبٸت ادام ٶلٸپ, 4444 ادام جارالانعانىن انىقتاعان. الايدا بۇل تسيفر مۇنان ەلدەقايدا كٶپ بولۋى مٷمكٸن, ٶيتكەنٸ تولىق راستاي الاتىن جاعدايلار عانا قامتىلعان.
ايتا كەتەيٸك, ودەسسانىڭ ٸرگەسٸندەگٸ ەۋە شابۋىلى رەسەي قورعانىس مينيسترلٸگٸ قارا تەڭٸزدەگٸ ۋكراينانىڭ زمەينىي ارالىنان ٶز ەسكەرٸن شىعارعانىن راستاعان كٷننٸڭ ەرتەسٸنە جاسالدى. مينيسترلٸك "زمەينىي ارالىنداعى تاپسىرمانى اياقتاپ, ٸزگٸ ەرٸك-جٸگەر قادامى رەتٸندە ونداعى گارنيزوندى شىعارعانىن" مەلٸمدەگەن. ۋكراينا ەسكەريلەرٸ ٶزدەرٸ اتقىلاعاننان كەيٸن رەسەيلٸكتەردٸڭ ارالدان "ەسكەرٸنٸڭ قالعان بٶلٸگٸن ەكٸ قايىقپەن اسىعىس-ٷسٸگٸس ەكەتكەنٸن" حابارلاعان. قارا تەڭٸزدٸڭ سولتٷستٸك-باتىسىندا ورنالاسقان زمەينىي ارالى ۋكراينانىڭ ودەسسا وبلىسى جاعالاۋى مەن ودەسسا قالاسىنىڭ پورتىنا باراتىن تەڭٸز جولىن باقىلاۋدا ۇستاۋ ٷشٸن ماڭىزدى نىسان سانالادى.
