Odessanyń irgesinde Resei kúshteriniń áýe shabýylynan qiraǵan úi men ondaǵy adamdardy izdep júrgen qutqarýshylar. Ýkraina, 1 shilde 2022 jyl.
Ýkraina biligi ótken túni Odessa qalasynyń shetindegi turǵyn úi men demalys ornyn atqylaǵan Resei kúshteriniń áýe shabýylynan keminde 18 adam qaza taýyp, 30-dan astamy jaralanǵanyn habarlady, dep jazady Azattyq.
"1 shildede túngi saǵat birdiń shamasynda Belgorod-Dnestrov aýdanyndaǵy qala tiptes kentte zymyran soqqysynan toǵyz qabat turǵyn úi ishinara búlinip, oǵan japsarlas salynǵan dúken órtendi" dep habarlady Ýkrainanyń tótenshe jaǵdailar jónindegi memlekettik qyzmeti. Áýe shabýyly saldarynan 16 adam mert bolyp, 30-ǵa jýyq adam jaralanǵan. Qiraǵan ǵimarat astynda qalǵan jeti adam (úsheýi – bala) qutqarylǵan.
Ekinshi zymyran túsken sol mańdaǵy demalys ornynan keiinirek taǵy bir eresek adam men bir bala óli tabylǵan. Zymyrandar túsken jerde qutqarýshylar jumys istep jatyr.
Ýkrainanyń "Ońtústik" basshylyǵynyń habarlaýynsha, kópqabatty turǵyn úi men demalys ornyn Reseidiń Tý-22 strategiialyq bombalaýshy ushaǵy úsh H-22 zymyranymen atqan.
Resei qorǵanys ministrligi Odessa mańyna jasalǵan bul áýe shabýyly týraly ázirge eshteńe aitpady.
Osy oqiǵanyń qarsańynda BUU Ýkrainadaǵy soǵysta qaza tapqan beibit adamdar týraly baiandamasyn jariialaǵan. Resei Ýkrainaǵa basyp kirgen 24 aqpannan beri BUU sarapshylary Ýkrainanyń 30-dan astam qalasynda 3924 beibit adam ólip, 4444 adam jaralanǵanyn anyqtaǵan. Alaida bul tsifr munan áldeqaida kóp bolýy múmkin, óitkeni tolyq rastai alatyn jaǵdailar ǵana qamtylǵan.
Aita keteiik, Odessanyń irgesindegi áýe shabýyly Resei qorǵanys ministrligi Qara teńizdegi Ýkrainanyń Zmeinyi aralynan óz áskerin shyǵarǵanyn rastaǵan kúnniń ertesine jasaldy. Ministrlik "Zmeinyi aralyndaǵy tapsyrmany aiaqtap, izgi erik-jiger qadamy retinde ondaǵy garnizondy shyǵarǵanyn" málimdegen. Ýkraina áskerileri ózderi atqylaǵannan keiin reseilikterdiń araldan "áskeriniń qalǵan bóligin eki qaiyqpen asyǵys-úsigis áketkenin" habarlaǵan. Qara teńizdiń soltústik-batysynda ornalasqan Zmeinyi araly Ýkrainanyń Odessa oblysy jaǵalaýy men Odessa qalasynyń portyna baratyn teńiz jolyn baqylaýda ustaý úshin mańyzdy nysan sanalady.
