اقش ۋكراينا اۋماعىندا ۋكراينداردى ۇستاپ, كٷشپەن رەسەيگە دەپورتاتسييالايتىن 18 رەسەيلٸك "تازالاۋ" لاگەرٸن انىقتادى. بۇل جٶنٸندە اقش-تىڭ ەقىۇ-داعى ميسسييا ٶكٸلٸ كورتني وستريانعا سٷيەنگەن The New York Times باسىلىمى جازدى, دەپ حابارلايدى ازاتتىق.
وسترياننىڭ سٶزٸنە قاراعاندا, رەسەي مۇنداي لاگەرلەردٸ 24 اقپانعا دەيٸن ۋكراينا مەن رەسەي جاعىندا ەزٸرلەي باستاعان.
ۆەناداعى ەقىۇ كەزدەسۋٸ كەزٸندە وستريان "تازالاۋ" لاگەرلەرٸ ۋكراينانىڭ شىعىسى مەن وڭتٷستٸك-شىعىسىنداعى مەكتەپتەر مەن سپورت ورتالىقتارى, مەدەنيەت مەكەمەلەرٸندە ورنالاسقانىن ايتتى. قازٸر بۇل اۋماق رەسەي باقىلاۋىندا. ونىڭ سٶزٸنە قاراعاندا, رەسەي بيلٸگٸ ۋكراين حالقىن سوعىس باستالماي جاتىپ "تازالاۋعا" تىرىسقان.
"رەسەيدٸڭ رەسمي تۇلعالارى ۋكرايناعا باقىلاۋ ورناتۋعا كەدەرگٸ كەلتٸرەتٸن ۋكراين ازاماتتارىن ۇستاپ, "تازالاۋدان" ٶتكٸزۋ ٷشٸن تٸزٸم قۇراستىرعان بولۋى مٷمكٸن. تٸزٸمدە ۋكراينشىل ازاماتتار – ساياسي تۇلعالار مەن بەلسەندٸلەر, قاۋٸپسٸزدٸك قىزمەتٸنٸڭ قىزمەتكەرلەرٸ دە بار" دەدٸ وستريان.
ول "تازالاۋ" لاگەرلەرٸن ستالين كەزەڭٸندەگٸ قۋعىن-سٷرگٸنمەن سالىستىرىپ, ونى "رەسەي تاريحىنداعى ۇزاققا سوزىلعان جاپپاي دەپورتاتسييا مەن حالىقتاردى جويۋدىڭ ٷلگٸسٸ" دەپ اتادى.
ۋكراينا ٷكٸمەتٸنٸڭ دەرەگٸنە سٷيەنگەن وستريان سوعىس كەزٸندە ۋكراينادان رەسەيگە شامامەن 1,6 ملن تۇرعىن كٷشپەن كٶشٸرٸلگەنٸن ايتتى. 250 مىڭى – بالا.
"بۇل دەرەكتەردٸ تەكسەرۋ مٷمكٸن ەمەس. اشىق تٸزٸم جوق, ادامداردىڭ تاعدىرى جٶنٸندە سۇرايتىن شۇعىل جەلٸ دە ۇيىمداستىرىلماعان, ەسەپ بەرۋ جوق" دەدٸ وستريان.
وسىعان دەيٸن حالىقارالىق باق رەسەيمەن شەكاراداعى "تازالاۋ" لاگەرلەرٸندە بولعان كۋەگەرلەر تۋرالى ماقالا باسقان. كٶبٸ دٶرەكٸ قارىم-قاتىناس پەن قوقان-لوقىعا شاعىمدانعان. "تازالاۋ" پروتسەسٸ كەزٸندە ۋكراينا بيلٸگٸن قولدادى دەپ كٷدٸككە ٸلٸنگەن ۋكراين ازاماتتارىنىڭ ايتۋىنشا, ولار قىزمەتٸنەن قۋىلعان, ولاردىڭ ەرٸ قارايعى تاعدىرى بەلگٸسٸز. كۋەگەرلەر سونىمەن بٸرگە رەسەي ەسكەرٸنٸڭ قۇجاتتارىن تەركٸلەپ, رەسەي ازاماتتىعىن قابىلداۋدى تالاپ ەتكەنٸن ايتقان.
