AQSh Ýkraina aýmaǵynda ýkraindardy ustap, kúshpen Reseige deportatsiialaityn 18 reseilik "tazalaý" lagerin anyqtady. Bul jóninde AQSh-tyń EQYU-daǵy missiia ókili Kortni Ostrianǵa súiengen The New York Times basylymy jazdy, dep habarlaidy Azattyq.
Ostriannyń sózine qaraǵanda, Resei mundai lagerlerdi 24 aqpanǵa deiin Ýkraina men Resei jaǵynda ázirlei bastaǵan.
Venadaǵy EQYU kezdesýi kezinde Ostrian "tazalaý" lagerleri Ýkrainanyń shyǵysy men ońtústik-shyǵysyndaǵy mektepter men sport ortalyqtary, mádeniet mekemelerinde ornalasqanyn aitty. Qazir bul aýmaq Resei baqylaýynda. Onyń sózine qaraǵanda, Resei biligi ýkrain halqyn soǵys bastalmai jatyp "tazalaýǵa" tyrysqan.
"Reseidiń resmi tulǵalary Ýkrainaǵa baqylaý ornatýǵa kedergi keltiretin ýkrain azamattaryn ustap, "tazalaýdan" ótkizý úshin tizim qurastyrǵan bolýy múmkin. Tizimde ýkrainshyl azamattar – saiasi tulǵalar men belsendiler, qaýipsizdik qyzmetiniń qyzmetkerleri de bar" dedi Ostrian.
Ol "tazalaý" lagerlerin Stalin kezeńindegi qýǵyn-súrginmen salystyryp, ony "Resei tarihyndaǵy uzaqqa sozylǵan jappai deportatsiia men halyqtardy joiýdyń úlgisi" dep atady.
Ýkraina úkimetiniń deregine súiengen Ostrian soǵys kezinde Ýkrainadan Reseige shamamen 1,6 mln turǵyn kúshpen kóshirilgenin aitty. 250 myńy – bala.
"Bul derekterdi tekserý múmkin emes. Ashyq tizim joq, adamdardyń taǵdyry jóninde suraityn shuǵyl jeli de uiymdastyrylmaǵan, esep berý joq" dedi Ostrian.
Osyǵan deiin halyqaralyq BAQ Reseimen shekaradaǵy "tazalaý" lagerlerinde bolǵan kýágerler týraly maqala basqan. Kóbi dóreki qarym-qatynas pen qoqan-loqyǵa shaǵymdanǵan. "Tazalaý" protsesi kezinde Ýkraina biligin qoldady dep kúdikke ilingen ýkrain azamattarynyń aitýynsha, olar qyzmetinen qýylǵan, olardyń ári qaraiǵy taǵdyry belgisiz. Kýágerler sonymen birge Resei áskeriniń qujattaryn tárkilep, Resei azamattyǵyn qabyldaýdy talap etkenin aitqan.
