مەجٸلٸس تٶراعاسى نۇرلان نىعماتۋلين بيزنەس-احۋالدى جاقسارتۋ مەسەلەلەرٸ بويىنشا جاڭا زاڭ جوباسىنان بەسەكەلەستٸك ورتاسىن جەتٸلدٸرۋگە كەدەرگٸ كەلتٸرەتٸن نورمالاردى الىپ تاستاۋدى تاپسىردى, دەپ حابارلايدى قازاقپارات.
«كەيٸنگٸ كەزدە وتاندىق نارىقتا بەسەكەلەستٸك ورتاسى ايتارلىقتاي ناشارلاپ كەتتٸ. بٷگٸنگٸ كٷنٸ اق پەن جشس سەكٸلدٸ 24 كەسٸپورىن تٷرٸ مونوپولييالىق تٷردە باعانى رەتتەۋ مەسەلەسٸن قولعا الىپ العان. بۇل كەرەك دەسەڭٸز ٷكٸمەت وتىرىسىندا دا جەكە تالقىلاناتىن مەسەلەگە اينالدى. وسى جىلدىڭ قاڭتار ايىنداعى ٷكٸمەتتٸڭ كەڭەيتٸلگەن وتىرىسىندا پرەزيدەنت نارىقتاعى مەملەكەتتٸك قانا ەمەس, جەكە كەسٸپورىنداردىڭ دا مونوپوليياسىن ەرەكشە اتاپ ٶتٸپ, دەمونوپوليزاتسييا بويىنشا ناقتى تاپسىرمالاردى بەرگەن ەدٸ. ال سٸزدەر نە ۇسىنىپ وتىرسىزدار? سٸزدەر وعان قارسى ۇسىنىستاردى ەنگٸزدٸڭٸزدەر», - دەدٸ نۇرلان نىعماتۋلين ٷكٸمەت باسشىسىنىڭ ورىنباسارى- قارجى مينيسترٸ ەليحان سمايىلوۆقا قاراتا ايتقان سٶزٸندە.
مەجٸلٸس تٶراعاسى جاڭا زاڭ بوينىشا نارىق سۋبەكتٸلەرٸنە كونكۋرستىق تەرتٸپ كٶزدەلەتٸنٸنە قاتىستى ناقتى جۇمىستار بارىن دا ايتىپ ٶتتٸ.
«بٸراق سٸزدەر ۇسىنىس وتىرعان تىڭ ۇسىنىستار مەملەكەتتٸك مەكەمەلەرگە, تٸپتٸ اۋدان ەكٸمدٸكتەرٸنە دەيٸن جاڭا مونوپولييالاردى قۇرۋعا جول اشقالى وتىر. بۇل مەملەكەت باسشىسىنىڭ تاپسىرماسىنا قايشى كەلەدٸ عوي. ەرٸپتەستەرٸمنٸڭ ۋەجٸمەن كەلٸسەمٸن. كەرەكسٸز نورمانى زاڭ جوباسىنان الىپ تاستاۋ كەرەك», - دەدٸ ول پارلامەنت مەجٸلٸسٸنٸڭ جالپى وتىرىسىندا.
مەجٸلٸس تٶراعاسىنىڭ بۇل ەسكەرتپەسٸمەن ۇلتتىق ەكونوميكا مينيسترٸ رۋسلان دەلەنوۆ كەلٸسەتٸنٸن جەتكٸزٸپ, زاڭ جوباسىن ەكٸنشٸ وقىلىمدا تٷزەيتٸنٸن مەلٸم ەتتٸ.
ەسكە سالا كەتسەك رۋسلان دەلەنوۆ بٷگٸن مەجٸلٸستە قازاقستانداعى بيزنەس-احۋالدى جاقسارتۋ مەسەلەلەرٸ بويىنشا جاڭا زاڭ جوباسىن تانىستىرعان بولاتىن.
