نۇر-سۇلتان قالاسىنىڭ سىعاناق كٶشەسٸندە ورنالاسقان "كٶركەم Tower" تۇرعىن ٷي كەشەنٸندە تٶتەنشە جاعداي بولدى. تۇرعىن ٷيدٸڭ التىنشى قاباتىنداعى پەتەردٸڭ تەرەزەسٸنە مۇنارالى كران قۇلادى, دەپ حابارلايدى "ۇلت اقپارات".
ەلەۋمەتتٸك جەلٸدە تاراعان ۆيدەوداعى جاعدايدىڭ ەلوردادا بولعانىن قالالىق تٶتەنشە جاعدايلار دەپارتامەنتٸنٸڭ باسپاسٶز قىزمەتٸ راستادى.
«28 سەۋٸر كٷنٸ ساعات 14.26-دا نۇر-سۇلتان قالاسى تٶتەنشە جاعدايلار دەپارتامەنتٸنٸڭ جەدەل-قۇتقارۋ جاساعىنىڭ بٶلٸمشەلەرٸ 4 ادام, بٸر تەحنيكادان جاساقتالعان قۇراممەن سىعاناق كٶشەسٸ 2ا مەكەنجايىنا شىقتى.
وقيعا ورنىنا جەتكەن بويدا 6-قاباتتاعى پەتەردٸڭ تەرەزەسٸنە اۆتوكراننىڭ ٸلگەگٸ قۇلاعانى بەلگٸلٸ بولدى. اتالعان ورىنعا ٶنەركەسٸپ قاۋٸپسٸزدٸگٸ كوميتەتٸنٸڭ نۇر-سۇلتان قالاسى بويىنشا دەپارتامەنتٸنٸڭ ماماندارى جٸبەرٸلدٸ. زارداپ شەككەندەر جوق. وقيعانىڭ مەن-جايى انىقتالىپ جاتىر», - دەلٸنگەن حابارلامادا.
