نۇر-سۇلتاندا ويىن الاڭىندا جٷرگەن 13 جاسار بالانى توق سوقتى. وقيعا 12 شٸلدەدە سارىارقا اۋدانىندا كونستيتۋتسييا كٶشەسٸندە بولعان, دەپ حابارلايدى "ۇلت اقپارات".
«بالا دوبىن الۋ ٷشٸن شارباققا مٸنگەندە, جابىق فۋتبول الاڭىنىڭ ٷستٸنەن ٶتكەن ەلەكتر جەلٸسٸنە تيٸپ كەتكەن. جاسٶسپٸرٸم قۇلاپ, «كلينيكالىق ٶلٸم» حالٸنە تٷستٸ. كۋەگەرلەردٸڭ ايتۋىنشا, جەدەل جەردەم دەرٸگەرلەرٸ شۇعىل مەديتسينالىق كٶمەك كٶرسەتٸپ, سونىڭ ارقاسىندا بالا ەسٸن جيعان», - دەلٸنگەن Instagram-داعى Astanovka98 پاراقشاسىندا.
قالالىق پوليتسييا دەپارتامەنتٸ وقيعانىڭ مەن-جايىنىڭ انىقتالىپ جاتقانىن حابارلادى.
«12 شٸلدەدە ساعات 18.00-دە قالالىق بالالار اۋرۋحاناسىنا تٷرلٸ جاراقاتپەن كەمەلەتكە تولماعان جاسٶسپٸرٸم جەتكٸزٸلگەن. 13 جاسار بالا كونستيتۋتسييا كٶشەسٸنٸڭ بويىنداعى ويىن الاڭىندا (فۋتبول الاڭى) دەنەسٸن جاراقاتتاپ العان. وقيعانىڭ مەن-جايى انىقتالىپ جاتىر», - دەپ اتاپ ٶتتٸ نۇر-سۇلتان قالالىق پوليتسييا دەپارتامەنتٸ.
اتالعان فاكتٸ بويىنشا سوتقا دەيٸنگٸ تەرگەۋ جۇمىستارى جٷرٸپ جاتىر. قاجەتتٸ ساراپتامالار تاعايىندالدى, سونىڭ نەتيجەسٸ بويىنشا پروتسەسسۋالدىق شەشٸم قابىلدانادى.
