قازاقستان تۇڭعىش پرەزيدەنتٸ نۇرسۇلتان نازارباەۆ حالىققا ٷندەۋ جاسادى, - دەپ حابارلايدى "ۇلت اقپارات" elbasy.kz سايتىنا سٸلتەمە جاساپ.
"قۇرمەتتٸ وتانداستار! ارداقتى اعايىن! 2022 جىل حالقىمىز ٷشٸن كٷردەلٸ دە قاتەرلٸ سىناقتان باستالدى. بارشاڭىزعا مەلٸم, ۇيىمداسقان ەكسترەميستٸك توپتار ەلٸمٸزدە جاپپاي تەرتٸپسٸزدٸك ورناتىپ, تەرروريستٸك شابۋىل جاسادى. سونىڭ سالدارىنان بەيبٸت تۇرعىندارىمىز زارداپ شەكتٸ. قاسٸرەتتٸ وقيعا كەزٸندە قازا بولعانداردىڭ جاقىندارى مەن تۋعان-تۋىستارىنىڭ قايعىسىنا ورتاقتاسىپ, كٶڭٸل ايتامىن. لاڭكەستەر ەلدٸگٸمٸز بەن ەگەمەندٸگٸمٸزگە, تىنىشتىعىمىز بەن تۇتاستىعىمىزعا قاۋٸپ تٶندٸرٸپ, جۇرتتىڭ بەرەكەسٸن قاشىردى. پرەزيدەنتٸمٸز قاسىم-جومارت كەمەلۇلى توقاەۆتىڭ شۇعىل شەشٸمدەرٸنٸڭ ارقاسىندا ەل ٸرگەسٸ سٶگٸلگەن جوق. مەملەكەت باسشىسىن قولداۋ - بارشامىزدىڭ ازاماتتىق بورىشىمىز", - دەدٸ ەلباسى.
نازارباەۆ ەندٸ وسى وقيعادان ساباق الىپ, مۇنداي باسسىزدىققا جول بەرمەۋ كەرەگٸن ايتتى.
"بابالارىمىز عاسىرلار بويى اڭساعان تەۋەلسٸزدٸكتٸڭ وتىز جىلى ٸشٸندە اتقارعان ٸستەرٸمٸز از ەمەس. قازاقستان ەلەمگە تانىلعان ەڭسەلٸ ەلگە اينالدى. ۇلان-عايىر شەكارامىز تٷبەگەيلٸ بەكٸتٸلدٸ. ەلٸمٸزدە ٸرگەلٸ رەفورمالار جٷزەگە اسىپ, ورتالىق ازييادا كٶش باستادىق. ەۋرازييا جٷرەگٸندە, سارىارقا تٶسٸندە جاڭا استانامىز بوي كٶتەردٸ. بٸرلٸك باردا ەشبٸر جاۋ ساعىمىزدى سىندىرا الماس", - دەدٸ نازارباەۆ.
