اتىراۋ وبلىسىنا قر دەنساۋلىق ساقتاۋ ۆيتسە-مينيسترٸ لەززات اقتاەۆا باستاعان بٸر توپ مامان كەلدٸ, دەپ حابارلايدى "ۇلت اقپارات".
«قازٸرگٸ ۋاقىتتا رەانيماتولوگ دەرٸگەرلەر, نەوناتولوگتار, اكۋشەر-گينەكولوگتار كەلدٸ. ولاردىڭ اراسىندا پەدياترييا جەنە بالالار حيرۋرگيياسى ۇلتتىق عىلىمي ورتالىعىنىڭ ديرەكتورى ريزا بورانباەۆا دا بار. بارلىعى – جەتٸ مامان. ولاردان بٶلەك, رەسپۋبليكالىق ورتالىقتاردىڭ ماماندارى, نۇر-سۇلتان قالاسىنىڭ انا مەن بالا ۇلتتىق عىلىمي ورتالىعىنىڭ اكۋشەر-گينەكولوگى مەن انەستەزيولوگ-رەانيماتولوگى كەلدٸ», - دەيدٸ اتىراۋ وبلىسى دەنساۋلىق ساقتاۋ باسقارماسىنىڭ باسشىسى مەنشٷك ايمۇرزيەۆا.
ونىڭ ايتۋىنشا, 2019 جىلدىڭ باسىنان بەرٸ اتىراۋدا قالالىق پەرزەنتحانانى ەكٸنشٸ دەڭگەيدەن ٷشٸنشٸ دەڭگەيگە ٶتكٸزۋ جۇمىسى جٷرٸپ جاتىر. وسى ماقساتتا وبلىستىق پەريناتالدىق ورتالىقتىڭ انەستەزيولوگ-رەانيماتولوگى وسىندا اۋىستىرىلعان, ەكٸ نەوناتولوگ, تەجٸريبەلٸ ماماندار قابىلدانعان. اقتٶبە وبلىسىنان تاعى ەكٸ نەوناتولوگ مامان كەلەدٸ.
م. ايمۇرزيەۆانىڭ سٶزٸنە قاراعاندا, وبلىستىق پەريناتالدىق ورتالىق تا كٷشەيتٸلەدٸ. كەتكەن دەرٸگەرلەردٸڭ ورنىنا اتىراۋدان, ەلٸمٸزدٸڭ باسقا ٶڭٸرٸنەن ماماندار تارتىلادى.
ەسكە سالا كەتسەك, اتىراۋ وبلىستىق پەريناتالدى ورتالىعىنىڭ باسشىسى مەن دەرٸگەرٸ جاڭا تۋعان نەرەستەنٸ توڭازىتقىش كامەراسىنا سالىپ ٶلتٸردٸ دەگەن كٷدٸككە ٸلٸندٸ.
سىبايلاس جەمقورلىققا قارسى ٸس-قيمىل اگەنتتٸگٸنٸڭ حابارلاۋىنشا, دەرٸگەرلەر نەرەستە ٶلٸمٸ فاكتٸسٸن جابۋ ٷشٸن پارا بەرمەك بولعان.
