8 جىل بۇرىن مونبلاننان زٷبارجات, جاقۇت جەنە لاعىل تاستار سالىنعان قوراپ تاپقان فرانتسۋز الپينيسٸ وسى باعالى تاستاردىڭ جارتىسىن الادى. بۇل قوراپ مۇزدىقتىڭ ٷستٸندە 1950 نەمەسە 1966 جىلدارى Air India ۇشاعى اپاتقا ۇشىراعان كەزدە تٷسٸپ قالۋى مٷمكٸن, دەپ حابارلايدى قازاقپارات BBC-گە سٸلتەمە جاساپ.
ەسٸمٸ جارييا ەتٸلمەگەن الپينيست 2013 جىلى مونبلان تاۋىنداعى مۇزدىقتان مەتالل قوراپ تاۋىپ العان. باعالى تاستاردىڭ جانىنداعى پاكەتتەردە «ٷندٸستاندا جاسالعان» دەگەن جازۋ بولعان. سوندىقتان, فرانتسۋز بيلٸگٸ ونىڭ جارتى عاسىردان استام ۋاقىت بۇرىن مونبلاندا اپاتقا ۇشىراعان ٷندٸ لاينەرٸنٸڭ جولاۋشىلارىنىڭ بٸرٸنە تيەسٸلٸ دەپ بولجاعان.
باعى بار الپينيست فرانتسييا زاڭىنا سەيكەس, تاپقان ولجاسىن پوليتسيياعا الىپ بارىپ, وسى ۋاقىتقا دەيٸن باعالى زاتتاردىڭ يەسٸنٸڭ تۋىستارى تابىلار ما ەكەن دەپ كٷتكەن. بٸراق, ولار تابىلمادى.
ەندٸ, سەگٸز جىلدان كەيٸن شاموني كوممۋناسىنىڭ بيلٸگٸ زاڭعا سەيكەس الپينيستپەن باعالى زاتتاردى تەڭدەي بٶلٸسكەن. ونىڭ ەربٸر بٶلٸگٸ 150 مىڭ ەۋرو دەپ باعالانىپ وتىر. شاموني مەرٸ ەريك فۋرنە فرانس-پرەسس اگەنتتٸگٸنە وسى تۋرالى ايتا وتىرىپ, الپينيستٸ زاڭعا باعىنعانى ٷشٸن ماقتاپ وتىر.
مونبلاندا ٶتكەن عاسىردا ەكٸ ٷندٸ لاينەرٸ قۇلاعان. 1950 جىلعى اپاتتان 48 ادام, 1966 جىلى – 117 ادام مەرت بولدى.
فرانتسييا بيلٸگٸ باعالى تاستاردى بومبەيدەن (قازٸرگٸ مۋمباي) نيۋ-يورككە ۇشقان ەكٸنشٸ لاينەردٸڭ جولاۋشىسى ٶزٸمەن بٸرگە الىپ بارا جاتقان دەپ بولجاپ وتىر. الپينيستەر ەكٸ اپاتتان كەيٸن بٸرنەشە ۋاقىت ٶتسە دە مونبلاننان جٷك قالدىقتارى مەن ادام سٷيەكتەرٸن تاۋىپ وتىرعان.
2012 جىلى تاۋ بٶكتەرٸنەن ٷندٸستاننان ديلوماتييالىق پوشتا سالىنعان قاپ تابىلعان ەدٸ. وندا 1966 جىلعى گازەتتەر, كٷنتٸزبەلەر مەن جەكە حاتتار بولعان. 1966 جىلى ەۋە اپاتىنان ٷندٸ يادرولىق باعدارلاماسىنىڭ ەكەسٸ حومي دجەحانگير بابا قازا تاپقان.
