مەكسيكا كونگرەسٸنٸڭ دەپۋتاتتارى كەمەلەتكە تولعان ازاماتتاردىڭ ماريحۋانانى پايدالانۋعا رۇقسات بەرەتٸن زاڭنامالىق ٶزگەرتۋٸ ماقۇلدادى, دەپ حابارلايدى Euronews.
ٶزگەرٸستٸ 316 دەپۋتات قولداسا, 129-ى قارسى بولدى, تاعى 23-ٸ قالىس قالدى. قابىلدانعان تٷزەتۋلەر 18 جاستان اسقان تۇرعىنعا جەكە پايدالانۋعا ارنالعان 28 گراممعا دەيٸن كاننابيس الىپ جٷرۋگە, سونداي-اق تۇرعىلىقتى جەرٸندە التى-سەگٸز تٷپ قاراسورا ٶسٸرۋگە رۇقسات بەرەدٸ. زاڭ ەرەجەسٸن بۇزعاندارعا ايىپپۇل سالىنىپ, تٷرمەگە قامالۋى مٷمكٸن. الايدا كەيبٸر ۇيىمدار ماريحۋانانى ساقتاۋ تولىعىمەن زاڭداستىرىلماعانىن سىنعا الدى.
كاننابيس تۋرالى تٷپكٸلٸكتٸ شەشٸمدٸ سەنات قابىلدايدى. داۋىس بەرۋ 30 سەۋٸرگە دەيٸن ٶتۋٸ كەرەك. كانادا مەن ۋرۋگۆايدان كەيٸن امەريكا قۇرلىعىنداعى ماريحۋانانى زاڭداستىرعان ٷشٸنشٸ ەل – مەكسيكا بولادى. مەكسيكا بيلٸگٸ كاننابيستٸڭ اينالىمىن زاڭمەن رەتتەۋ ارقىلى قۋاتتى ەسٸرتكٸ كارتەلدەرٸن ەلسٸرەتۋدٸ كٶزدەيدٸ.
