ماعجان جۇماباەۆ — تٷركٸ حالىقتارىنىڭ تەگٸ بٸر تۇتاستىعى مەن بٸرلٸگٸن جٷرەگٸنەن ٶتكٸزە جىرلاعان اقىننىڭ بٸرٸ ھەم بٸرەگەيٸ.
1919-1920 جىلدارى ماعجاننىڭ اتاتٷرiك باستاعان ۇلت-ازاتتىق قوزعالىسى تۋرالى «الىستاعى باۋىرىما» اتتى ٶلەڭ جازعانى بەلگٸلٸ. ارادا 83 جىل ۋاقىت ٶتكەننەن كەيٸن بۇل ٶلەڭگە تٷرٸك اقىنى فەيزۋللاح بۋداك ٶلەڭمەن جاۋاپ جازعان. فەيزۋللاح بۋداك - قازاق-تٷرٸك ەدەبيەتٸنٸڭ ٶزارا بايلانىسىنا اتسالىسىپ جٷرگەن قالامگەرلەردٸڭ بٸرٸ. بٷگٸن قوس ٶلەڭدٸ وقىرماندار نازارىنا ۇسىنۋدى جٶن كٶرٸپ وتىرمىز.
ماعجان جۇماباەۆ. الىستاعى باۋىرىما
الىستا اۋىر ازاپ شەككەن باۋىرىم,
قۋارعان بەيشەشەكتەي كەپكەن باۋىرىم,
قاماعان قالىڭ جاۋدىڭ ورتاسىندا
كٶل قىلىپ كٶزدٸڭ جاسىن تٶككەن باۋىرىم.
الدىڭدا اۋىر قايعى جاتقان باۋىرىم,
ٶمٸرٸ جاپا شەككەن جاتتان باۋىرىم.
تٷكسيگەن جٷرەگٸ تاس جاۋىز جاندار,
تٸرٸدەي تەرٸڭ توناپ جاتقان باۋىرىم.
اپىرماي, ەمەس پە ەدٸ التىن التاي —
انامىز بٸزدٸ تاپقان اساۋ تايداي!
باۋىرىندا جٷرمەپ پە ەدٸك سالىپ ويناق,
جٷزٸمٸز ەمەس پە ەدٸ جارقىن ايداي!
الالى التىن ساقا اتىسپاپ پا ەك,
تەبٸسٸپ بٸر تٶسەكتە جاتىسپاپ پا ەك.
التايداي انامىزدىڭ اق سٷتٸنەن
بٸرگە ەمٸپ, بٸرگە دەمٸن تاتىسپاپ پا ەك.
تۇرماپ پا ەدٸ, بٸز ٷشٸن مٶلدٸر بۇلاق
سىلدىراپ, سىلق-سىلق كٷلٸپ, تاۋدان قۇلاپ.
دايار بوپ ۇشقان قۇستاي سوققان قۇيىن,
تٸلەگەن بٸر-بٸر تۇلپار بەينە پىراق!
التايدىڭ التىن كٷنٸ ەركەلەتٸپ,
كەلگەندە جولبارىس بوپ, جاڭا ەرجەتٸپ,
اق تەڭٸز, قارا تەڭٸز ار جاعىنا,
باۋىرىم, مەنٸ تاستاپ قالدىڭ كەتٸپ.
مەن قالدىم — جاس بالاپان قانات قاقپاي,
ۇشام دەپ ۇمتىلسام دا دامىل تاپپاي.
جٶن سٸلتەر, جول كٶرسەتەر جان بولمادى,
جاۋىز جاۋ قويسىن با ەندٸ مەنٸ اتپاي.
قورعاسىن جاس جٷرەككە وعى باتتى,
كٷنەسٸز تازا قانىم سۋداي اقتى.
قانسىراپ, ەلٸم قۇرىپ ەستەن تاندىم,
قاراڭعى اباقتىعا بەرٸك جاپتى.
كٶرمەيمٸن كەشە جٷرگەن قىر-سايدى دا,
كٷندٸز — كٷن, تٷندە — كٷمٸس نۇرلى ايدى دا.
ارداقتاپ, شىن جٸبەكتەي ارايعا وراپ
ٶسٸرگەن التىن انام — التايدى دا.
اپىرم-اي, ايرىلدىق پا قالىڭ توپتان,
شابىلىپ قايتپايتۇعىن جاۋعان وقتان.
تٷرٸكتٸڭ جولبارىستاي جٷرەگٸنەن
شىنىمەن قورقاق قۇل بوپ جاۋدان بۇققان.
شارق ۇرىپ, ەرٸككە ۇمتىلعان تٷرٸك جانى,
شىنىمەن اۋىردى ما بٸتٸپ حالٸ?!
وت سٶنٸپ جٷرەكتەگٸ, قۇرعادى ما
قايناعان تامىرداعى اتا قانى?!
باۋىرىم, سەن و جاقتا, مەن بۇ جاقتا,
قايعىدان قان جۇتامىز.
بٸزدٸڭ اتقا
لايىق پا قۇل بوپ تۇرۋ?
كەل, كەتەلٸك
التايعا, اتا ميراس, التىن تاققا!
ماعجاننىڭ بۇل ٶلەڭٸنە تٷرٸك اقىنى فەيزۋللاح بۋداكتىڭ جازعان جاۋابى:
الىستان ازابىمدى بٸلگەن باۋىرىم,
جۇباتىپ, كٶزدٸڭ جاسىن سٷرتكەن باۋىرىم.
وتىرىپ ٶزٸ جاۋدىڭ ورتاسىندا,
كٶڭٸلدٸ مۇڭ — زارىما بٶلگەن باۋىرىم.
تۇمشالىپ قايعى-مۇڭعا قالدىم, باۋىرىم,
قۋارىپ بەيشەشەكتەي سولدىم, باۋىرىم.
سەن دۇشپاندى بۇرىننان بٸلۋشٸ ەدٸڭ,
مەن ەندٸ سوعان كۋە بولدىم, باۋىرىم.
انامىز ەدٸ-اۋ ورتاق التىن التاي,
ول بٸر تۇلپار بولعاندا, بٸز بٸر-بٸر تاي.
باۋىرىندا ويناق سالىپ بٸز جٷرگەندە,
تاپ بٸزدەي جاينامايتىن كٷن مەنەن اي.
الالى التىن ساقا اتقان ەدٸك,
تەبٸسٸپ بٸر تٶسەكتە جاتقان ەدٸك.
التايداي انامىزدىڭ اق سٷتٸن دە
بٸرگە ەمٸپ, بٸرگە دەمٸن تاتقان ەدٸك.
سىلدىراپ بٸزدەر ٷشٸن بۇلاق اقتى,
شاتىرلاپ نايزاعايلار ويناپ جاتتى.
دايار بوپ ۇشقان قۇس پەن سوققان قۇيىن,
بٸز مٸنگەن اتتار — تۇلپار, ھەم پىراقتى.
بٸر كٷنٸ بۇل دەۋرەننٸڭ سوڭى جەتٸپ,
تەڭٸردٸڭ جازۋىمەن ساپار شەكتٸك.
اق تەڭٸز, قارا تەڭٸز اسساقتاعى,
جٷرەكتٸ سول التايعا تاستاپ كەتتٸك.
بٸلەمٸن ۇشام دەدٸڭ, ۇشا المادىڭ,
دەرمەنسٸز, كٶككە قانات قاعا المادىڭ.
جٶن سٸلتەپ, جول كٶرسەتەر ەشكٸمٸڭ جوق,
دۇشپاننىڭ تىرناعىنان قاشا المادىڭ.
ساعان اتقان وق ماعان ٶتٸپ جاتتى,
كٷنەسٸز قانىمىزدى تٶگٸپ جاتتى.
ەگەردە قان تٶگٸلسە مىنا بٸزدٸڭ,
تٷبٸمٸزگە بٶلٸنۋ جەتٸپ جاتتى.
مەن دە اڭسايمىن كەشەگٸ قىر-سايدى دا,
كٷندٸز — كٷن, تٷندە — كٷمٸس نۇرلى ايدى دا.
بٸزدٸ جٸبەك قۇنداققا وراپ الىپ,
باۋىرىندا ەلپەشتەگەن انا — التايدى دا.
ايىرىلىپ بٸر-بٸرٸمٸزدەن, وتقا تٷستٸك,
تاريحتىڭ قازانىندا قايناپ پٸستٸك.
تايسالىپ قايتپايتۇعىن جاۋعان وقتان
جٸگٸتتٸك, باتىرلىقتىڭ انتىن ٸشتٸك.
ۇمتىلعان بوستاندىققا تٷرٸك جانى,
اۋىرىپ كٶرگەن ەمەس, بٸتٸپ قانى.
جٷرەكتٸڭ جالىن وتى سٶنگەن ەمەس,
سوعىپ تۇر تامىرىندا اتا قانى.
باۋىرىم, سەن و جاقتا, مەن بۇ جاقتا,
نە تاپتىق شاشىراعاندا شارتاراپقا?
بارلىعىن كٷش-قايراتتىڭ جيناۋ كەرەك,
اتادان ميراس قالعان ۇلى وتاندا.
