ٶسكەمەندە لاتىن قارپٸندە جازۋدان جارىس ٶتتٸ. باس جٷلدە يەگەرٸنە قازاقتىڭ قارا دومبىراسى بەرٸلدٸ, دەپ حابارلايدى "ۇلت اقپارات".
«لاتىن گرافيكاسى – ٶركەنيەت جازۋى» اتتى اكتسييانى وبلىستىق تٸلدەردٸ دامىتۋ باسقارماسى ۇيىمداستىردى.
– «رۋحاني جاڭعىرۋ» باعدارلاماسى اياسىندا ٶتكٸزٸلەتٸن ٸس-شارانىڭ ماقساتى – لاتىن گرافيكاسىنداعى جاڭا ەلٸپبيدٸڭ مەن-ماڭىزىن كٶپشٸلٸككە تانىستىرۋ, تۇرعىنداردىڭ جاڭا ەلٸپبيگە قىزىعۋشىلىعىن ارتتىرۋ ەدٸ. بۇل ماقسات ورىندالدى, – دەيدٸ شقو تٸلدەردٸ دامىتۋ باسقارماسىنىڭ باسشىسى ايدىن شايماردانوۆ.
جارىس 4 كەزەڭنەن تۇردى. بٸرٸنشٸ كەزەڭنٸڭ شارتى بويىنشا سٶزدەردٸ لاتىن قارپٸمەن 60 سەكۋند ٸشٸندە جازۋ كەرەك بولدى. بۇل كەزەڭگە 42 ادام قاتىستى. كەلەسٸ كەزەڭگە ٶتكەن 28 قاتىسۋشى ماقالدىڭ ەكٸنشٸ جارتىسىن تاۋىپ قانا قويماي, 120 سەكۋند ٸشٸندە ونىڭ جالعاسىن لاتىن گرافيكاسىندا جازدى. ٷشٸنشٸ كەزەڭدە قاتىسۋشىلار كٷردەلٸ سٶزدٸڭ قۇرامىنداعى ەرٸپتەردەن بٸرنەشە سٶز جازۋدان بەسەكەگە تٷستٸ. ول كەزەڭنەن 3 سايىسكەر جىلدامدىق تانىتىپ, سوڭعى كەزەڭگە ٶتتٸ. سوڭعى كەزەڭدە كٶك ەكرانعا بەرٸلگەن سۋرەتتەرگە قاراپ, سٶيلەم قۇراستىرىپ, ونى لاتىن گرافيكاسىمەن ساۋاتتى جازعان سايىسكەرلەردٸڭ ٸشٸندە جۇپار حۋان 1-ورىندى, ەرلان ماگدانوۆ 2-ورىندى, ەركەجان مۇراتقىزى 3-ورىندى جەڭٸپ الدى.
