قىزىلوردا قالاسىندا كانالعا سۋعا باتىپ كەتكەن سەگٸز جاستاعى ۇل بالانىڭ دەنەسٸ تابىلدى, دەپ حابارلايدى "ۇلت اقپارات".
وقيعا وبلىس ورتالىعىنا قاراستى قاراۋىلتٶبە اۋىلدىق وكرۋگٸندە 25 مامىردا كەشكٸ ساعات 20.30 شاماسىندا بولعان. سول ۋاقىتتا تۋىسىمەن ەگٸستٸكتٸ سۋارۋ كانالى ٷستٸندەگٸ جٷرگٸنشٸلەر كٶپٸرٸندە ول ابايسىزدا قۇلاپ, كانالعا سۋعا باتىپ كەتكەن.
قۇزىرلى سالا ماماندارى ونىڭ دەنەسٸن ەكٸ كٷننەن استام ۋاقىت بويى ٸزدەستٸردٸ. نەتيجەسٸندە بٷگٸن ساعات 16.39-دا دەنەسٸ تابىلدى. ٸزدەستٸرۋ شارالارىنا بارلىعى 111 ادام مەن 9 تەحنيكا قاتىستى. ونىڭ ٸشٸندە 64 ادام (5 تەحنيكا) وبلىستىق تٶتەنشە جاعدايلار دەپارتامەنتٸ مەن وعان قاراستى مەكەمەلەردە قىزمەت اتقارادى.
«نەگٸزٸ اتالعان كٶپٸر ادامداردىڭ جٷرۋٸنە ارنالماعان. ول سۋ شارۋاشىلىعى مەكەمەسٸنٸڭ سۋ ٶلشەۋٸ ٷشٸن جاسالعان. بالا سول جەرگە سۋ الۋ ماقساتىندا بارعان. قولىنداعى ىدىسى كانالعا تٷسٸپ, سونى الۋعا ىڭعايلانعان سەتتە قۇلاپ كەتكەن. وبلىستا جىل باسىنان بەرٸ 14 ادام سۋعا كەتٸپ, قايتىس بولدى. ونىڭ 9-ى كەمەلەتكە تولماعان», - دەدٸ قىزىلوردا وبلىسى تٶتەنشە جاعدايلار دەپارتامەنتٸ باستىعىنىڭ ورىنباسارى باۋىرجان ٸزباساروۆ.
وبلىس اۋماعىندا 19 ٸرٸ كانال, 220 شاعىن كانال, 207 كٶل ورنالاسقان. جالپى 64 جابدىقتالماعان ۋچاسكە قاۋٸپتٸ سانالادى.
«بٷگٸندە 65 ەسكەرتۋ تاقتايشاسى ورناتىلدى. بۇل جۇمىستار جالعاسادى. قايعىلى جاعدايدىڭ نەگٸزگٸ سەبەبٸ - قاۋٸپسٸزدٸك شاراسىن ساقتاماعاننان. سونىمەن قاتار, اتا-انالاردىڭ بالالاردى قاراۋسىز قالدىرۋى بولىپ وتىر. بٸزدٸڭ تاراپىمىزدان ازاماتتاردىڭ سۋداعى قاۋٸپسٸزدٸگٸن قامتاماسىز ەتۋ ٷشٸن جۇمىستار جٷرگٸزٸلۋدە», - دەدٸ وبلىستىق جۇمىلدىرۋ دايىندىعى باسقارماسىنىڭ باسشىسى مەدەت ۋساين.
