Qyzylorda qalasynda kanalǵa sýǵa batyp ketken segiz jastaǵy ul balanyń denesi tabyldy, dep habarlaidy "Ult aqparat".
Oqiǵa oblys ortalyǵyna qarasty Qaraýyltóbe aýyldyq okrýginde 25 mamyrda keshki saǵat 20.30 shamasynda bolǵan. Sol ýaqytta týysymen egistikti sýarý kanaly ústindegi júrginshiler kópirinde ol abaisyzda qulap, kanalǵa sýǵa batyp ketken.
Quzyrly sala mamandary onyń denesin eki kúnnen astam ýaqyt boiy izdestirdi. Nátijesinde búgin saǵat 16.39-da denesi tabyldy. Izdestirý sharalaryna barlyǵy 111 adam men 9 tehnika qatysty. Onyń ishinde 64 adam (5 tehnika) oblystyq tótenshe jaǵdailar departamenti men oǵan qarasty mekemelerde qyzmet atqarady.
«Negizi atalǵan kópir adamdardyń júrýine arnalmaǵan. Ol sý sharýashylyǵy mekemesiniń sý ólsheýi úshin jasalǵan. Bala sol jerge sý alý maqsatynda barǵan. Qolyndaǵy ydysy kanalǵa túsip, sony alýǵa yńǵailanǵan sátte qulap ketken. Oblysta jyl basynan beri 14 adam sýǵa ketip, qaitys boldy. Onyń 9-y kámeletke tolmaǵan», - dedi Qyzylorda oblysy Tótenshe jaǵdailar departamenti bastyǵynyń orynbasary Baýyrjan Izbasarov.
Oblys aýmaǵynda 19 iri kanal, 220 shaǵyn kanal, 207 kól ornalasqan. Jalpy 64 jabdyqtalmaǵan ýchaske qaýipti sanalady.
«Búginde 65 eskertý taqtaishasy ornatyldy. Bul jumystar jalǵasady. Qaiǵyly jaǵdaidyń negizgi sebebi - qaýipsizdik sharasyn saqtamaǵannan. Sonymen qatar, ata-analardyń balalardy qaraýsyz qaldyrýy bolyp otyr. Bizdiń tarapymyzdan azamattardyń sýdaǵy qaýipsizdigin qamtamasyz etý úshin jumystar júrgizilýde», - dedi oblystyq jumyldyrý daiyndyǵy basqarmasynyń basshysy Medet Ýsain.
