قىتايدان كەلگەن قانداس اقىن ەرلان امانقوجاۇلى ٸندەتپەن كٷرەسٸپ جاتقان قازاق حالقىنا ارناۋ ايتتى, دەپ حابارلايدى "ۇلت اقپارات".
ارناۋدىڭ ۆيدەوسىن اقىن ەلەۋمەتتٸك جەلٸدەگٸ پاراقشاسىندا جارييالادى.
«ەل باردا ەر قور بولماس, ەر باردا ەل قور بولماس» دەيدٸ دانا حالقىمىز. دەل قازٸرگٸ ٶلارا جاعدايدا ەلگە دە, ەل تٸزگٸنٸن ۇستاعان ەرگە دە اۋىر سىناقتار تٷسٸپ تۇر. جۇدىرىقتاي بولىپ جۇمىلا بٸلگەن ەل عانا بۇنداي نەۋبەتتٸ امان-ەسەن جەڭٸپ شىعارى سٶزسٸز. بٸرلٸگٸمٸز جاراسپاي ٶز ٸشٸمٸزدەن قۇجىراساق, وندا بۇل جالعان وپا بەرمەسٸ ايان. «بالاپان باسىنا, تۇرىمتاي تۇسىنا» تارتپاي اۋىز بٸرلٸگٸمٸزدٸ ساقتاپ, قيىن-قىستاۋ جاعدايدان ٶز ەلٸمٸزبەن بٸرگە عانا شىعا الامىز. جات بٸرەۋ كەلٸپ بٸزدٸ جىعىلعان ورىنىمىزدان تۇرعىزبايدى. ەلدٸگٸمٸزدٸڭ تۋىن ۇستاپ, كٶشٸن باستاپ كەلە جاتقان پرەزيدەنت قاسىم-جومارت كەمەلۇلىنىڭ باستاعان كٶشٸنە سەنٸم بٸلدٸرٸپ, وسى قىسپاقتان ەلٸن امان الىپ شىعاتىنىنا قولداۋ كٶرسەتسەك قانا حالىق ويلاعان كٷن تەزٸرەك اتار. ەل سەنٸمٸ اقتالار», - دەيدٸ اقىن Facebook پاراقشاسىندا.
ەرلان امانقوجانىڭ جازۋىنشا وسى بٸر كٷردەلٸ كەزەڭدە شەتتەن كەلگەن قانداستاردىڭ اتىنان پانا بولعان وتانىمىزعا بٸر اۋىز ريزاشىعىن جەتكٸزۋ - ازاماتتىق پارىزى ەكەنٸن ايتادى.
«سىن ساعاتتان سٷرٸنبەي ٶتٸپ, بەتٸ جامان ٸندەتتەن تەزٸرەك ايىعىپ, ەلٸمٸز تىنىش, جۇرتىمىز امان بولسا ەكەن. قازاعىمنىڭ ەل تٸزگٸنٸن سەنٸپ تاپسىرعان ازاماتتارى سەنٸمٸنەن شىعىپ, ٷمٸتٸن اقتاپ, ەرتەڭٸمٸز جارقىن بولسىن!» - دەيدٸ ول.
ەرلان امانقوجاۇلى 1988 جىلى 5 قاراشادا قىتاي حالىق رەسپۋبليكاسىنىڭ ٸلە قازاق وبلىسى مۇڭعۇلكٷرە اۋدانىندا دٷنيەگە كەلگەن. 2004 جىلدان باستاپ ايتىسقا قاتىسقان. ايماقتىق ايتىستا 4 مەرتە بٸرٸنشٸ ورىن, ٸلە قازاق اۆتونومييالى وبلىسىنىڭ دەستٷرلٸ ايتىستارىندا 2 مەرتە باس جٷلدە, شىڭجاڭ ٶلكەلٸك ايتىستا 2 مەرتە ەكٸنشٸ ورىندى, ٶزٸنٸڭ تۋعان جەرٸ مۇڭعۇلكٷرە اۋدانىندا 12 مەرتە باس جٷلدە العان. 2017 جىلى اتىراۋدا ٶتكەن حالىقارالىق اقىندار ايتىسىندا ٷشٸنشٸ ورىندى, 2019 جىلى اقسۋاتتا ٶتكەن حالىقارالىق ايتىستىڭ باس جٷلدەسٸن ەنشٸلەگەن.
