قىرعىز-تەجٸك مەملەكەتتٸك شەكاراسىنداعى جاعداي سالىستىرمالى تٷردە العاندا تۇراقتاندى, دەپ حابارلايدى "ۇلت اقپارات".
باتكەن وبلىسىندا ورنالاسقان شەكارا بٶلٸمشەلەرٸ كٷشەيتٸلگەن رەجيمدە قىزمەت اتقارۋدا. قىرعىز-تەجٸك مەملەكەتتٸك شەكاراسىنداعى ٶتكٸزۋ بەكەتتەرٸ شتاتتىق رەجيمدە جۇمىس ٸستەپ جاتىر.
تەجٸكستان مەن قىرعىز رەسپۋبليكالارىنىڭ قۇقىق قورعاۋ ورگاندارىنىڭ بٸرلەسكەن تەرگەۋ توبى قاقتىعىستىڭ سەبەپتەرٸ مەن مەن-جايدى انىقتاۋ ماقساتىندا تەرگەۋ جٷرگٸزبەك.
قىرعىزستاننىڭ «كابار» اگەنتتٸگٸنٸڭ حابارلاۋىنشا, باتكەن وبلىسىنداعى مەملەكەتتٸك شەكارانىڭ قىرعىز-تەجٸك ۋچاسكەسٸندەگٸ كٷش قۇرىلىمدارى بٶلٸمشەلەرٸنٸڭ ٸس – قيمىلدارىن باس شتاب باستىعى-قىرعىز رەسپۋبليكاسىنىڭ مەملەكەتتٸك شەكارا قىزمەتٸ تٶراعاسىنىڭ بٸرٸنشٸ ورىنباسارى پولكوۆنيك ەبدٸكەرٸم ەلٸمباەۆ ٷيلەستٸرەدٸ.
قىرعىز رەسپۋبليكاسىنىڭ مەملەكەتٸك شەكارا قىزمەتٸنٸڭ مەلٸمەتٸنشە, قاڭتاردىڭ 9-ىنان 10-ىنا قاراعان تٷنٸ ساعات 00:40-تا باتكەن وبلىسى باتكەن اۋدانى جاقا-ٶرۋك جەرٸندە بەلگٸسٸز بٸرەۋلەر باتكەنگە بارا جاتقان قىرعىزستان ازاماتىنا تيەسٸلٸ كٶلٸككە تاس لاقتىرعان. ولار تەجٸكستان اۋماعىندا جاسىرىنعان. قىرعىز رەسپۋبليكاسىنىڭ قۇقىق قورعاۋ ورگاندارىنىڭ اقپاراتى بويىنشا, كٶلٸكتە بولعان قىرعىزستاننىڭ ازاماتتارى زارداپ شەككەن. شامامەن بٸر ساعاتتان كەيٸن تەجٸكستاننىڭ كوچو-كارىن ەلدٸ مەكەنٸندەگٸ ازاماتتار باتكەننەن كٶك-تاش اۋىلىنا بارا جاتقان قىرعىزستاننىڭ باسقا ازاماتىنىڭ كٶلٸگٸنە تاس لاقتىرعان. شامامەن 2 ساعات 40 مينۋتتا تەجٸكستان ازاماتتارى داحما جەرٸندە قىرعىزستان ازاماتىنىڭ ٷيٸنە تاس لاقتىرعان. شەكاراشىلار قۇقىق قورعاۋ ورگاندارىنىڭ ٶكٸلدەرٸمەن بٸرلەسٸپ قىرعىزستان ازاماتىنىڭ ٷيٸنە بارا جاتقاندا ولارعا تەجٸكستان تاراپىنان ۇساق كاليبرلٸ اڭشى مىلتىعىنان وق اتىلعان.
تەجٸكستاننىڭ ۇقك شەكارا ەسكەرلەرٸنٸڭ باسپاسٶز ورتالىعىنا سٸلتەمە جاساعان «حوۆار» تەجٸك اقپارات اگەنتتٸگٸنٸڭ حابارلاۋىنشا, 2020 جىلى 9 قاڭتاردا كەشكە باتكەن اۋدانى اقساي اۋىلدىق كەڭەسٸنٸڭ كٶكتوش اۋىلى تۇرعىندارىنىڭ ٷلكەن توبى اڭشى قارۋىمەن قارۋلانىپ, قىرعىزستان ازاماتى ابدۋلاەۆ سۇلتانبەك يسمايلۇلىنىڭ ٷيٸنٸڭ ماڭىندا جينالىپ, يسفارا قالاسى چوركۋح اۋىلدىق كەڭەسٸنٸڭ سومونييون اۋىلىنىڭ جولىندا تەجٸك ازاماتتارىنىڭ جٷرٸپ ٶتۋٸنە كەدەرگٸ كەلتٸرگەن.
