فوتو: Tengrinews.kz
الماتىدا تۇرعىن ٷي كەشەنٸن سالعىسى كەلگەن قۇرىلىس كومپانيياسى اتىشۋلى كٶشەنٸ تۇرعىندارعا قايتارىپ بەردٸ, - دەپ حابارلايدى Tengrinews.kz پورتالى.
ەڭگٸمە تيميريازەۆ پەن سەتباەۆ كٶشەلەرٸنٸڭ اراسىندا ورنالاسقان پوليتەحنيچەسكايا كٶشەسٸ تۋرالى بولىپ وتىر. بوستاندىق اۋدانىنىڭ تۇرعىندارىمەن كەزدەسۋٸندە قالا ەكٸمٸ ەربولات دوساەۆ الماتىلىقتار بۇل جولدى قايتا پايدالانا الاتىنىن ايتتى.
"بىلتىر جەلتوقساننىڭ باسىندا پوليتەحنيچەسكايا كٶشەسٸنٸڭ جابىلۋى قوعامدا رەزونانس تۋدىردى. قۇرىلىس سالۋشىنىڭ جوباسى بويىنشا سەرٸكتەستٸككە تيەسٸلٸ بۇل كٶشەنٸڭ بٸر بٶلٸگٸ جابىلىپ, وعان ەكٸ تۇرعىن ٷي كەشەنٸ سالىنادى دەپ جوسپارلانعان بولاتىن.
قۇرىلىس سالۋشى جوبانى ٶزگەرتتٸ, قازٸرگٸ ۋاقىتتا كٶشە اشىق, كومپانييانىڭ جەكە قاراجاتى ەسەبٸنەن جول بٶلٸگٸ قالپىنا كەلتٸرٸلدٸ. اقپاننىڭ اياعىنا دەيٸن جەر تەلٸمٸ قالانىڭ كوممۋنالدىق مەنشٸگٸنە بەرٸلەدٸ", - دەدٸ مەگاپوليس باسشىسى.
