«بارىس» بٷگٸن قۇرلىقتىق حوككەي ليگاسىنداعى كەزەكتٸ ويىنىن ەلوردادا رەسەيدٸڭ «اۆتوموبيليست» (ەكاتەرينبۋرگ) كومانداسىمەن ٶتكٸزدٸ, دەپ حابارلايدى قازاقپارات.
كەزدەسۋ اسا تارتىستى ٶتتٸ. كوماندالار بٸر-بٸرٸنٸڭ قاقپاسىنا جيٸ شابۋىلدادى. نەتيجەسٸندە ولار قاقپادان ساڭىلاۋ تاپتى.
بٸرٸنشٸ كەزەڭدە كوماندالار بٸر-بٸر شايبادان الماستى. ويىننىڭ 2-مينۋتىندا «بارىس» حوككەيشٸسٸ داررەن ديتس مەرگەندٸك تانىتسا, 4-مينۋتتا رەسەيلٸك كوماندادان دانيل رومانتسەۆ تارازى باسىن تەڭەستٸردٸ.
ەكٸنشٸ كەزەڭنٸڭ 29-مينۋتىندا قازاقستاندىق ەگور پەتۋحوۆ قايتادان «بارىستى» العا شىعارسا, ودان كەيٸن «اۆتوموبيليست» ساپىنان دجەسسي بلەكەر 31, گەورگيي بەلوۋسوۆ 37-مينۋتتاردا كٶزدەگەن نىسانادان مٷلت كەتكەن جوق.
ٷشٸنشٸ كەزەڭدە باستالعاننان كەيٸن قازاقستاندىق كوماندادان نيكيتا ميحايليس 43, دجو مورروۋ 46-مينۋتتاردا گول سوقسا, 50-مينۋتتا رەسەيلٸك الەكسەي ماكەەۆ تاعى دا تارازى باسىن تەڭەستٸردٸ.
نەگٸزگٸ كەزەڭ 4:4 ەسەبٸمەن اياقتالىپ, ويىن وۆەرتايمعا ۇلاستى. وۆەرتايمدا جەڭٸس شايباسىن ياكۋب ليليا سوقتى. وسىلايشا «بارىس» قارسىلاسىنان 5:4 ەسەبٸمەن باسىم تٷستٸ.
ەندٸ «بارىس» 29 قىركٷيەكتە سىرت ايدىندا رەسەيدٸڭ «مەتاللۋرگ» (ماگنيتوگورسك) كومانداسىمەن كەزدەسەدٸ.
