ۋكراينانىڭ ەۋروپالىق وداق قۇرامىنا قوسىلۋى ەۋرازييالىق ەكونوميكالىق وداققا قانداي دا بٸر نۇقسان كەلتٸرمەيدٸ. بۇل تۋرالى پەتەربۋرگ حالىقارالىق ەكونوميكالىق فورۋمىنىڭ پلەنارلىق وتىرىسىندا قازاقستان پرەزيدەنتٸ قاسىم-جومارت توقاەۆ مەلٸم ەتتٸ, دەپ حابارلايدى قازاقپارات.
«ۋكراينانىڭ ەۋروپالىق وداققا قوسىلۋ مٷمكٸندٸگٸ ەۋرازييالىق ەكونوميكالىق وداققا قانداي دا بٸر نۇقسان كەلتٸرمەيدٸ دەپ سانايمىن. ۋكراينانىڭ ەۋروپالىق وداققا قوسىلۋى قالاي جٷرگٸزٸلەتٸنٸ باسقا مەسەلە, سەبەبٸ وندا ٶتە قاتاڭ تالاپتار بار. ال ۋكراينانىڭ ەكونوميكاسى بولسا كٷردەلٸ جاعدايدا تۇر. وسى ورايدا ولاردا ۋكراينا ٷشٸن ارنايى جەڭٸلدەتٸلگەن باعدارلاما بولۋى ىقتيمال», - دەدٸ توقاەۆ فورۋمدا قويىلعان سۇراققا جاۋاپ بەرە وتىرىپ.
بۇل تۇرعىدا مەملەكەت باسشىسى اتالعان ەلدٸڭ قازٸرگٸ جاعدايى قاسٸرەتكە تولى ەكەنٸن ايتتى.
سونىمەن قاتار قازاقستان پرەزيدەنتٸ كەڭەستٸك كەزەڭدە ۋكراينا كەڭەس وداعىنىڭ استىق قويماسى ەرٸ ٶنەركەسٸپتٸك دامىعان رەسپۋبليكا بولعانىن ەسكە سالدى.
«ەۋروپالىق وداق تۋرالى مەسەلەگە توقتالسام, ۋكراينانىڭ قوسىلۋىنا قولداۋ كٶرسەتۋ تۋرالى شەشٸم قابىلداندى. بۇل ٶز كەزەگٸندە ەكونوميكالىق وداق. ەگەر دەل وسى ەكونوميكالىق ۇيىمدا ۋكراينانى ٶز قاتارلارىندا كٶرگٸلەرٸ كەلسە, وندا مۇنى اقيقات دەپ قابىلداۋ كەرەك», - دەدٸ ول.
