قازاقستان پرەزيدەنتٸ قاسىم-جومارت توقاەۆ شىعىس قازاقستانداعى كولونييادا جازاسىن ٶتەپ جاتقان ەيەلگە راقىمشىلىق جاسادى, دەپ حابارلايدى "ۇلت اقپارات" Polisia.kz سايتىنا سٸلتەمە جاساپ.
مەملەكەت باسشىسى لاريسا انتونيۋكتٸڭ راقىمشىلىق جاساۋ تۋرالى ٶتٸنٸشٸنە قول قويدى, ەندٸ ەيەل مەرزٸمٸنەن بۇرىن بوساتىلادى.
لاريسا انتونيۋك 2011 جىلى جۇبايىن ٶلتٸرگەنٸ ٷشٸن سوتتالعان. ونى تٷركٸمەنستان سوتى 21 جىلعا باس بوستاندىعىنان ايىرعان بولاتىن. تاعى 10 جىلى قالعان. لاريسا بولاشاق جۇبايىمەن قازاقستاندا تانىسقان, كەيٸن بٸراز ۋاقىتتان سوڭ قارىم-قاتىناسىن زاڭداستىرعان. ٷيلەنگەننەن كەيٸن جاستار جٸگٸتتٸڭ تۋعان جەرٸنە – تٷرٸكمەنستانعا كٶشٸپ بارادى. سوتتالۋشىنىڭ ايتۋىنشا, كٷيەۋٸنٸڭ اتا-اناسى ونى بٸردەن قابىلداماعان. كەيٸن ول جۇبايىنىڭ ەسٸرتكٸگە تەۋەلدٸ ەكەنٸن بٸلگەن. ەر ادام قارجىلىق قيىندىقتارعا تاپ بولىپ, وتباسى مٷشەلەرٸنە قول كٶتەرە باستاعان, ەسٸرتكٸ الۋ ٷشٸن اقشا تالاپ ەتكەن. لاريسا جۇمىستا جٷرگەندە بالالاردىڭ ٶمٸرٸ ٷشٸن ٷنەمٸ قورقىپ وتىراتىنىن ايتقان. الايدا بٸر كٷنٸ كەزەكتٸ جانجال كەزٸندە ول ٶزٸن قورعايمىن دەپ كٷيەۋٸن ٶلتٸرٸپ الادى. لاريسا جەرگٸلٸكتٸ كولونيياعا قامالىپ, تٶرت بالاسى بالالار ٷيٸنە جٸبەرٸلەدٸ. كەيٸن ول قازاقستانعا قايتارىلادى, وندا ٶسكەمەننەن 200 شاقىرىم جەردەگٸ ەيەلدەر كولونيياسىندا جازاسىن ٶتەيدٸ. لاريسانىڭ ەپكەسٸ بالالاردى بالالار ٷيٸنەن الىپ كەتٸپ, قامقورلىعىنا الدى. 2020 جىلدىڭ مامىرىندا قىلمىستىق-اتقارۋ جٷيەسٸنٸڭ قىزمەتكەرلەرٸ وعان بالالارىمەن ۆيدەوقوڭىراۋ ارقىلى سٶيلەسۋگە مٷمكٸندٸك بەرەدٸ, ول سول كەزدە 10 جىلدا العاش رەت بالالارىن كٶردٸ. سوتتالعان كەزدە بالاسى ەكٸ جاستا بولعان. وعان قامقورلىقتى ٷلكەن قىزى موينىنا الدى, قازٸر ول كٷيەۋٸمەن كٸشكەنتايلارعا قارايدى, بەرٸ بٸر شاڭىراق استىندا تۇرادى.
«مەكەمە قىزمەتكەرلەرٸ قاجەتتٸ ماتەريالداردى ۋاقىتىلى جيناپ, جٸبەردٸ. قازاقستان پرەزيدەنتٸ لاريسا انتونيۋككە راقىمشىلىق جاسادى. سوتتالۋشىنىڭ مەرزٸمٸ 21 جىلدان 16 جىلعا قىسقارتىلدى. ول تيٸستٸ قۇجاتپەن تانىستى. راقىمشىلىققا بايلانىستى ونىڭ رەسمي مەرزٸمٸ 2021 جىلدىڭ شٸلدەسٸنٸڭ سوڭىندا اياقتالادى. لاريسا جازاسىن ٶتەۋ كەزٸندە ٶزٸن جاقسى جاعىنان كٶرسەتتٸ. تٸگٸن تسەحىندا جۇمىس ٸستەيدٸ. بارلىق مەدەني ٸس-شارالارعا بەلسەندٸ قاتىسادى», – دەپ حابارلادى شقو بويىنشا قىلمىستىق-اتقارۋ جٷيەسٸ دەپارتامەنتٸنٸڭ باسشىسى جانبولات قالەتاەۆ.
