Qazaqstan Prezidenti Qasym-Jomart Toqaev Shyǵys Qazaqstandaǵy koloniiada jazasyn ótep jatqan áielge raqymshylyq jasady, dep habarlaidy "Ult aqparat" Polisia.kz saityna silteme jasap.
Memleket basshysy Larisa Antoniýktiń raqymshylyq jasaý týraly ótinishine qol qoidy, endi áiel merziminen buryn bosatylady.
Larisa Antoniýk 2011 jyly jubaiyn óltirgeni úshin sottalǵan. Ony Túrkimenstan soty 21 jylǵa bas bostandyǵynan aiyrǵan bolatyn. Taǵy 10 jyly qalǵan. Larisa bolashaq jubaiymen Qazaqstanda tanysqan, keiin biraz ýaqyttan soń qarym-qatynasyn zańdastyrǵan. Úilengennen keiin jastar jigittiń týǵan jerine – Túrikmenstanǵa kóship barady. Sottalýshynyń aitýynsha, kúieýiniń ata-anasy ony birden qabyldamaǵan. Keiin ol jubaiynyń esirtkige táýeldi ekenin bilgen. Er adam qarjylyq qiyndyqtarǵa tap bolyp, otbasy múshelerine qol kótere bastaǵan, esirtki alý úshin aqsha talap etken. Larisa jumysta júrgende balalardyń ómiri úshin únemi qorqyp otyratynyn aitqan. Alaida bir kúni kezekti janjal kezinde ol ózin qorǵaimyn dep kúieýin óltirip alady. Larisa jergilikti koloniiaǵa qamalyp, tórt balasy balalar úiine jiberiledi. Keiin ol Qazaqstanǵa qaitarylady, onda Óskemennen 200 shaqyrym jerdegi áielder koloniiasynda jazasyn óteidi. Larisanyń ápkesi balalardy balalar úiinen alyp ketip, qamqorlyǵyna aldy. 2020 jyldyń mamyrynda qylmystyq-atqarý júiesiniń qyzmetkerleri oǵan balalarymen videoqońyraý arqyly sóilesýge múmkindik beredi, ol sol kezde 10 jylda alǵash ret balalaryn kórdi. Sottalǵan kezde balasy eki jasta bolǵan. Oǵan qamqorlyqty úlken qyzy moinyna aldy, qazir ol kúieýimen kishkentailarǵa qaraidy, bári bir shańyraq astynda turady.
«Mekeme qyzmetkerleri qajetti materialdardy ýaqytyly jinap, jiberdi. Qazaqstan Prezidenti Larisa Antoniýkke raqymshylyq jasady. Sottalýshynyń merzimi 21 jyldan 16 jylǵa qysqartyldy. Ol tiisti qujatpen tanysty. Raqymshylyqqa bailanysty onyń resmi merzimi 2021 jyldyń shildesiniń sońynda aiaqtalady. Larisa jazasyn óteý kezinde ózin jaqsy jaǵynan kórsetti. Tigin tsehynda jumys isteidi. Barlyq mádeni is-sharalarǵa belsendi qatysady», – dep habarlady ShQO boiynsha qylmystyq-atqarý júiesi departamentiniń basshysy Janbolat Qaletaev.
