قر چەمپيوناتى: «قايرات» كٶش باسىنا شىقتى

بٷگٸن فۋتبولدان پرەمەر-ليگا كوماندالارى اراسىنداعى قازاقستان چەمپيوناتىنىڭ ٷشٸنشٸ تۋرىنىڭ ٷش ويىنى مەرەسٸنە جەتتٸ, دەپ حابارلايدى "ۇلت اقپارات".

العاشقى ويىن الماتىدا جەرگٸلٸكتٸ «قايرات» پەن تالدىقورعاننىڭ «جەتٸسۋ» كوماندالارى اراسىندا بولدى. بۇل كەزدەسۋدە الاڭ يەلەرٸ قارسىلاستار قاقپاسىنا جاۋاپسىز ٷش گول سوقتى. ويىننىڭ 11-مينۋتىندا كامو وگانەسيان «قايراتتى» العا شىعارسا, 56-مينۋتتا كونراد ۆجەششينسكيي ەسەپتٸ ٷستەمەلەي تٷستٸ. ال 90-مينۋتتا ارتۋر شۋشەناچەۆ قورىتىندى ەسەپتٸ بەلگٸلەدٸ. وسىلايشا «قايرات» قارسىلاسىنان 3:0 ەسەبٸمەن باسىم تٷستٸ. تۋرنير كەستەسٸندە كٶش باسىنا شىقتى.

پەتروپاۆلدا «قىزىلجار» كٶكشەتاۋدىڭ «وقجەتپەس» كلۋبىمەن كەزدەستٸ. ويىن بارىسىندا كٶكشەتاۋلىق فۋتبولشىلار ساپىنان جاسۇلان مولداقاراەۆ 28-مينۋتتا ەسەپ اشتى. ودان كەيٸنگٸ ٷش گولدى الاڭ يەلەرٸ سوقتى. الدىمەن گابرەل ەناكە تارازى باسىن تەڭەستٸردٸ. ال 76-مينۋتتا كٶكشەتاۋلىق پلامەن ديموۆ ٶز قاقپاسىنا گول سوعىپ السا, 87-مينۋتتا تيمۋر مۋلدينوۆ گول سوقتى. «قىزىلجار» جەڭٸسكە جەتٸپ, تۋرنير كەستەسٸندەگٸ جاعدايىن جاقسارتا تٷستٸ.

ال قوستانايدا جەرگٸلٸكتٸ «توبىل» اقتاۋدىڭ «كاسپييٸن» 2:0 ەسەبٸمەن تٸزە بٷكتٸردٸ. ويىننىڭ 84-مينۋتىندا ازات نۇرعاليەۆ, 89-مينۋتىندا ورالحان ٶمٸرتاەۆ قانجىعاسىن مايلادى. 

قازٸر قىزىلوردادا «قايسار» مەن «تاراز», شىمكەنتتە «ورداباسى» مەن قاراعاندىنىڭ «شاحتەرٸ» كەزدەسۋدە.