بٷگٸن قوستانايدا پوليتسييا قىزمەتكەرلەرٸن ٸٸم-نٸڭ مەدالدارىمەن جەنە گراموتالارىمەن ماراپاتتاۋ سالتاناتى ٶتتٸ. ماراپاتتالعانداردىڭ قاتارىندا جەلٸدە تانىمال بولعان اقتٷتەك بوراندا اۆتوكولونناعا جول كٶرسەتكەن پوليتسەي امانتاي بايجانوۆ تا بار, دەپ حابارلايدى "ۇلت اقپارات".
قوستاناي وبلىسى پوليتسييا دەپارتامەنتٸ باسشىسىنىڭ ورىنباسارى پوليتسييا پولكوۆنيگٸ ارداق ىنتىقباەۆ قوستاناي پب پاترۋلدٸك پوليتسييا باتالونى قىزمەتٸنٸڭ ينسپەكتورى امانتاي بايجانوۆقا «قۇقىق تەرتٸبٸن قامتاماسىز ەتۋگە قوسقان ٷلەسٸ ٷشٸن» مەدالٸن تابىستادى.
ٸشكٸ ٸستەر مينيسترلٸگٸنٸڭ گراموتاسىمەن سونداي-اق امانتايدىڭ ەرٸپتەسٸ, سول كٷنٸ ونىمەن بٸرگە قىزمەتتە بولعان ەمٸر شالعىمباەۆ تا ماراپاتتالدى.
ٸشكٸ ٸستەر مينيسترٸ پوليتسييا گەنەرال-لەيتەنانتى ە.ز.تۇرعىمباەۆتىڭ قولى قويىلعان بۇيرىقتا «قىزمەتتٸك بورىشىن ورىنداۋ كەزٸندە كٶرسەتكەن باتىلدىعى, جانكەشتٸلٸگٸ مەن ەرلٸگٸ ٷشٸن» دەلٸنگەن.
پوليتسييا پولكوۆنيگٸ ارداق ىنتىقباەۆ امانتاي مەن ەمٸردٸڭ اتا-اناسىنا العىس حات تابىستادى.
ەسكە سالا كەتەيٸك, قوستانايلىق پوليتسەي امانتاي بايجانوۆ اۆتوكٶلٸك تٸزبەگٸنە جول كٶرسەتۋ ٷشٸن بوراندا جٷگٸرٸپ جٷردٸ.
