اقتٶبە وبلىسىندا مەديتسينالىق كوللەدج تٷلەكتەرٸ جەدەل جەردەم بريگادالارىنا كٶمەكتەسەتٸن بولادى. ال ۋنيۆەرسيتەتتٸڭ وقىتۋشى-پروفەسسورلارى مەن رەزيدەنتتەرٸ اۋرۋحانالارعا جٸبەرٸلەدٸ, دەپ حابارلايدى "ۇلت اقپارات".
اقتٶبە وبلىسىندا قازٸر 4800-دەن استام مەدتسينا قىزمەتكەرٸ جۇمىس ٸستەيدٸ.
«مەديتسينا ۋنيۆەرسيتەتٸنٸڭ 112 رەزيدەنتٸ مەن 165 وقىتۋشى-پروفەسسورى ەمدەۋ, كەڭەس بەرۋ جۇمىسىنا تارتىلادى. سونىمەن بٸرگە بٷگٸننەن باستاپ جەدەل جەردەم مەن پروۆيزورلىق ەمدەۋ ورنىنا مەديتسينالىق كوللەدجدٸڭ 100-گە جۋىق تٷلەگٸ قوسىلدى», - دەدٸ وبلىس ەكٸمٸ وڭداسىن ورازالين.
ٶڭٸر باسشىسى تٸكەلەي ەفير كەزٸندە دەرٸ-دەرمەكپەن قامتاماسىز ەتۋ ٷشٸن جوسپارلى تولىقتىرۋ جٷرگەنٸن, دەمەۋشٸلەر ارقىلى قور جينالاتىنىن ايتتى.
«وبلىس بويىنشا 200-گە جۋىق مونيتورينگ توبى قۇرىلدى. ولار 4 مىڭنان استام تەكسەرۋ جٷرگٸزدٸ. تۇرعىندار تاراپىنان سۇرانىس ارتقان سوڭ قىزۋ تٷسٸرەتٸن دەرٸ, انتيبيوتيكتەر, ۆيرۋسقا قارسى پرەپاراتتاردىڭ جەتٸسپەۋشٸلٸگٸ بار. ونى بٸلەمٸن. وبلىستاعى 573 دەرٸحاناعا دەرٸ-دەرمەك ۋاقىلىتى كەلسە دە, تۇرعىنداردى تولىق قامتاماسىز ەتە الماي وتىر. دەرٸحانا يەلەرٸنە ەسكەرتۋ بەرٸلدٸ. سونىمەن بٸرگە كٶرشٸلەس رەسەيمەن بايلانىس ورناتىلدى», - دەدٸ وڭداسىن ورازالين.
