كوروناۆيرۋس تەستٸلەۋٸنە قاجەتتٸ رەاگەنتتەردٸڭ وڭتٷستٸك كورەيادان جەتكٸزٸلۋٸنە تاعى 2 اپتا كەرەك. بۇل تۋرالى Medical Partners Korea Qazaqstan كومپانيياسىنىڭ باسشىسى ايتتى, دەپ حابارلايدى قازاقپارات.
«MPK Qazaqstan» جشس وڭتٷستٸك كورەيادان ساپاسى جوعارى رەاگەنت جەتكٸزۋمەن اينالىسادى.
«كومپانييا بٸر اي بۇرىن تاپسىرىس بەرٸپ قويعانمەن, جٷكتٸ الۋعا, ساقتاندىرۋعا 2 اپتا ۋاقىت كەتكەن. ونى جەتكٸزۋگە تاعى 2 اپتا ۋاقىت كەتەدٸ.
قازٸر كورەيا مەن قازاقستان اراسىندا اپتاسىنا 1-اق رەيس ۇشادى. «Air Astana» ەۋە كومپانيياسى شۇعىل مەديتسينالىق جٷكتٸ جولاۋشىلار جٷگٸنٸڭ كٶپتٸگٸنە بايلانىستى تٷسٸرٸپ تاستاعان. كاتار ارقىلى تٸكەلەي رەيستەر تابىلدى. بٸراق, دوحا ەۋەجايىنداعى قىزمەتكەرلەرٸنٸڭ 30%-ىنان كوروناۆيرۋس تابىلعان سوڭ ولار قازٸر جۇمىسقا شىقپايدى. تاپسىرىس اپتانىڭ سوڭىندا جەتسە, بٸز ايدىڭ سوڭىنان باستاپ تەستٸلەۋدٸ جاڭارتا الامىز», - دەدٸ Medical Partners Korea باس ديرەكتورى مين حيسۋك.
ال «Air Astana» ەۋە كومپانيياسى جٷكتٸ قالدىرىپ كەتۋگە بايلانىستى تٷسٸنٸك بەردٸ.
«جولاۋشىلار رەيسٸ Airbus A321neo اۆيالاينەرٸمەن ۇشتى. بورتتا 142 جولاۋشى, 3732 كەلٸ جٷك بولدى. Medical Partners Korea جٷك تاسىمالى كومپانيياسى مەديتسينالىق جٷك بارىن الدىن الا ەسكەرتكەن جوق.
«Air Astana» جٷكتٸڭ مەدتسينالىق ماڭىزى بارىن بٸلمەگەندٸكتەن ستاندارتتى ٸس-شارالار جٷرگٸزگەن. بۇل احۋالدىڭ كٷردەلٸلٸگٸن ەسكەرە وتىرىپ, ەۋە كومپانيياسى جاقىن اراداعى رەيستە وڭتٷستٸك كورەيادان جٷكتٸ جەتكٸزٸپ بەرۋگە ۋەدە ەتەدٸ», - دەدٸ «Air Astana» ٶكٸلٸ كوممۋنيكاتسييالار دەپارتامەنتٸنەن.
ايتا كەتۋ كەرەك, الماتىدا كوروناۆيرۋسقا تەستٸلەۋگە قاتىستى قيىندىقتار ٶتكەن اپتادا باستالعان بولاتىن.
كەيبٸر زەرتحانالاردا قۇرال-جابدىقتار ٸستەن شىقسا, كەيبٸرٸندە تەستٸگە قاجەتتٸ رەاگەنتتەر تاپشىلىعى تۋعان.
