Koronavirýs testileýine qajetti reagentterdiń Ońtústik Koreiadan jetkizilýine taǵy 2 apta kerek. Bul týraly Medical Partners Korea Qazaqstan kompaniiasynyń basshysy aitty, dep habarlaidy QazAqparat.
«MPK Qazaqstan» JShS Ońtústik Koreiadan sapasy joǵary reagent jetkizýmen ainalysady.
«Kompaniia bir ai buryn tapsyrys berip qoiǵanmen, júkti alýǵa, saqtandyrýǵa 2 apta ýaqyt ketken. Ony jetkizýge taǵy 2 apta ýaqyt ketedi.
Qazir Koreia men Qazaqstan arasynda aptasyna 1-aq reis ushady. «Air Astana» áýe kompaniiasy shuǵyl meditsinalyq júkti jolaýshylar júginiń kóptigine bailanysty túsirip tastaǵan. Katar arqyly tikelei reister tabyldy. Biraq, Doha áýejaiyndaǵy qyzmetkerleriniń 30%-ynan koronavirýs tabylǵan soń olar qazir jumysqa shyqpaidy. Tapsyrys aptanyń sońynda jetse, biz aidyń sońynan bastap testileýdi jańarta alamyz», - dedi Medical Partners Korea bas direktory Min Hisýk.
Al «Air Astana» áýe kompaniiasy júkti qaldyryp ketýge bailanysty túsinik berdi.
«Jolaýshylar reisi Airbus A321neo avialainerimen ushty. Bortta 142 jolaýshy, 3732 keli júk boldy. Medical Partners Korea júk tasymaly kompaniiasy meditsinalyq júk baryn aldyn ala eskertken joq.
«Air Astana» júktiń medtsinalyq mańyzy baryn bilmegendikten standartty is-sharalar júrgizgen. Bul ahýaldyń kúrdeliligin eskere otyryp, áýe kompaniiasy jaqyn aradaǵy reiste Ońtústik Koreiadan júkti jetkizip berýge ýáde etedi», - dedi «Air Astana» ókili kommýnikatsiialar departamentinen.
Aita ketý kerek, Almatyda koronavirýsqa testileýge qatysty qiyndyqtar ótken aptada bastalǵan bolatyn.
Keibir zerthanalarda qural-jabdyqtar isten shyqsa, keibirinde testige qajetti reagentter tapshylyǵy týǵan.
