سوڭعى ٷش ايدا كٶكشەتاۋدا مەديتسينا قىزمەتكەرلەرٸنٸڭ اراسىندا كوروناۆيرۋس جۇقتىرۋدىڭ 80 جاعدايى تٸركەلگەن. بۇل تۋرالى كٶكشەتاۋ قالاسىنىڭ باس سانيتارلىق دەرٸگەرٸ قانات ىسقاقوۆ ايتتى, دەپ حابارلايدى "ۇلت اقپارات".
باس سانيتارلىق دەرٸگەردٸڭ ايتۋىنشا, جەلتوقساننىڭ 3-ٸندەگٸ جاعداي بويىنشا وبلىس ورتالىعىندا كوروناۆيرۋس ينفەكتسيياسى بويىنشا زەرتحانادا راستالعان 2420 جاعداي تٸركەلگەن.
«تامىزدىڭ 1-ٸنەن باستاپ COVID-19 بەلگٸلٸ بويىنشا 162 پنەۆمونييا تٸركەلدٸ. جالپى, قازان, قاراشا ايلارىندا كٶكشەتاۋ قالاسىنىڭ ەمدەۋ – الدىن الۋ ۇيىمدارىندا مەديتسينا قىزمەتكەرلەرٸنٸڭ اراسىندا كوروناۆيرۋس جۇقتىرۋدىڭ 80 جاعدايى انىقتالدى. وسى بويىنشا ناقتىلى كوميسسييالىق تەكسەرۋ جٷرگٸزٸلۋدە», - دەيدٸ قانات ىسقاقوۆ.
جالپى, قالادا اۋرۋدىڭ 355 وشاعى تٸركەلگەن بولسا, ونىڭ 78 ٷي. 200 ناۋقاس جۇقپالى اۋرۋلار ستاتسيونارىندا ەم قابىلداۋدا. 635 ادام ٷيٸندە دەرٸگەردٸڭ باقىلاۋىنا الىنعان. 15 ادامنىڭ جاعدايى اۋىر, 3 ادامنىڭ جاعدايى ٶتە اۋىر. سونىمەن بٸرگە, كوروناۆيرۋس ينفەكتسيياسى وقۋشىلار اراسىندا دا تٸركەلۋدە.
«وقۋ جىلى باستالعاننان بەرٸ كوروناۆيرۋس ينفەكتسيياسى بويىنشا زەرتحانادا راستالعان وقۋشىلار اراسىندا 56 جاعداي جەنە مەكتەپ قىزمەتكەرلەرٸ اراسىندا 22 جاعداي تٸركەلدٸ. كوروناۆيرۋس ينفەكتسيياسىنىڭ تارالۋىن بولدىرماۋ ماقساتىندا كارانتيندٸك تالاپتاردىڭ ساقتالۋىن قاداعالاۋ بويىنشا مونيتورينگٸلٸك توپتار جۇمىس ٸستەۋدە. پاندەمييا كەزٸندە 2763 نىسانعا رەيدتٸك تەكسەرٸس جٷرگٸزٸلدٸ. ونىڭ ٸشٸندە جالپى 37 ميلليون سومادان استام تەڭگەگە 760 ەكٸمشٸلٸك ايىپپۇل سالىندى», - دەپ تولىقتىردى قانات ىسقاقوۆ.
ايتا كەتەيٸك, 2020 جىلدىڭ 7 قاراشاسىنان باستاپ, كٶكشەتاۋ قالاسىنىڭ كارانتيندٸك ايماعى پەريمەترٸندە 6 سانيتارلىق پوست ورناتىلدى. قاراشا ايىندا انىقتالعان 890 جاعدايدىڭ 24 – كٶكشەتاۋ قالاسىنا سىرتتان كەلگەن (نۇر-سۇلتان-8, سقو - 7 (ايىرتاۋ اۋدانى - 2, پەتروپاۆل - 2, تالشىق - 2, كٸشكەنەكٶل - 1), قوستاناي - 3,الماتى - 1, قاراعاندى - 1, قىزىلوردا - 1, ششۋچە - 1, اتباسار اۋدانى - 1, بٸرجان سال اۋدانى - 1).
