فوتو: Polisia.kz
“كٶكشەتاۋ – قىزىلوردا” باعىتىنداعى پويىزدا جولاۋشى ەيەل كٶز جۇمدى, – دەپ حابارلايدى "ۇلت اقپارات" Polisia.kz پورتالىنا سٸلتەمە جاساپ.
"14 قاڭتاردا جامبىل وبلىسىنىڭ سارىشاعان ستانتسيياسىنا جاقىنداعاندا "كٶكشەتاۋ - قىزىلوردا" باعىتىنداعى جولاۋشىلار پويىزى ۆاگوندارىنىڭ بٸرٸندە استانادان شىمكەنتكە دەيٸن كٷيەۋٸمەن بٸرگە جولعا شىققان 54 جاستاعى ازاماتشا كەنەتتەن قايتىس بولدى.
سول كٷنٸ شۋ ستانتسيياسىنداعى جەلٸلٸك پوليتسييا بٶلٸمٸندە سوتقا دەيٸنگٸ تەرگەۋ باستالعان, ال مەيٸتتەن قىلمىستىق سيپاتتاعى ٶلٸم بەلگٸلەرٸ انىقتالمادى" - دەلٸنگەن حابارلامادا.
تەكسەرۋ بارىسىندا ەيەلدٸڭ 2019 جىلدان باستاپ استانا قالاسى اۋرۋحانالارىنىڭ بٸرٸندە سوزىلمالى اۋرۋمەن ەسەپتە تۇرعانى انىقتالعان. پويىز جولسەرٸكتەرٸنٸڭ كەلٸسٸمٸمەن, كٷيەۋٸ ەيەلٸنٸڭ مەيٸتٸن ورالعان كٷيٸندە پويىزدىڭ جۇمىس ٸستەمەيتٸن تامبۋرى ارقىلى شىمكەنت ستانتسيياسىنا دەيٸن تاسىمالداپ, جەتكٸزگەن.
ەر ادام سوت-مەديتسينالىق ساراپتامادان ٷزٸلدٸ-كەسٸلدٸ باس تارتقان. قازٸرگٸ ۋاقىتتا مەيٸتتٸ پويىزدا تاسىمالداۋ دەرەگٸنە قاتىستى ماتەريال جامبىل وبلىسى بويىنشا كٶلٸكتٸك باقىلاۋ ينسپەكتسيياسىنا بەرٸلگەن.
