قازاقستان مۇسىلماندارى دٸني باسقارماسى 31 شٸلدە, ياعني قاسيەتتٸ قۇربان ايتتىڭ بٸرٸنشٸ كٷنٸندە ەلٸمٸز بويىنشا قۇربان شالۋ رەسٸمٸنە قاتىستى ۇيىمداستىرۋ-ٷيلەستٸرۋ جۇمىستارى جوعارى دەڭگەيدە ٶتكەنٸن حابارلايدى. ٷيلەستٸرۋ جۇمىستارىنا بەكٸتٸلگەن ازاماتتار اراسىندا سانيتارلىق تالاپتاردىڭ ساقتالۋى قاتاڭ قاداعالاندى.
WWW.QURBAN2020.KZ جوباسىن جٷزەگە اسىرۋ ماقساتىندا ارنايى قۇرىلعان جۇمىس توبى كٷشەيتٸلگەن رەجيمدە قىزمەت ەتتٸ. نەتيجەسٸندە جۇمىستىڭ باسىم بٶلٸگٸ ورىندالدى. اتاپ ايتقاندا, قۇربان شالۋعا تاپسىرىس بەرۋشٸلەردٸڭ ٶتٸنٸشتەرٸن 13 ٶكٸلدٸك تولىق ورىندادى. قالعان 6 ٶكٸلدٸك (نۇر-سۇلتان قالاسى, الماتى قالاسى مەن اقتٶبە, اتىراۋ, قىزىلوردا, قوستاناي وبلىسى) جۇمىسىن جٷيەلٸ تٷردە جالعاستىرۋدا. اتقارىلعان ٸس-شارالاردىڭ فوتو, ۆيدەو ەسەبٸ تاپسىرىس بەرۋشٸلەرگە دەر كەزٸندە جولدانۋدا.
قازاقستان مۇسىلماندارى دٸني باسقارماسى قازٸرگٸ ۋاقىتقا دەيٸن 30 715 وتباسىعا قۇرباندىق ەتٸن جەتكٸزدٸ. سونىمەن قاتار, قۇرباندىق ەتٸ قارتتار, جەتٸمدەر, بالالار ٷيلەرٸ مەن اۋرۋحانالارعا تاراتىلدى. مەرەكەلٸك قۋانىشقا بٶلەنگەن جاندار العىستارىن ايتىپ, ريزاشىلىق سەزٸمدەرٸن بٸلدٸرۋدە. سونداي-اق, WWW.QURBAN2020.KZ قايىرىمدىلىق جوباسى اياسىندا قۇربان شالۋعا تاپسىرىس بەرگەن ازاماتتار تاراپىنان دا تەلەفون, ەلەۋمەتتٸك جەلٸ, ۋاتساپ ارقىلى وڭ پٸكٸرلەر كەلٸپ تٷسۋدە.
قۇربان ايتتاعى قايىرىمدىلىق شارالار بويىنشا 7 143 مۇقتاج جانعا ەت تاراتقان جامبىل وبلىسى كٶش باستاپ تۇر. ال قمدب-نىڭ الماتى ايماعى بويىنشا ٶكٸلدٸگٸ 4 182 وتباسىعا مەرەكەلٸك قۋانىش سىيلادى. تالدىقورعان ايماعى 2 789 مۇقتاج جانعا قۇرباندىق ەتٸن ٷلەستٸردٸ. سونداي-اق قاراعاندى وبلىسى - 2 191, شىعىس قازاقستان وبلىسى - 2 071, پاۆلودار وبلىسى - 1 910, نۇر-سۇلتان قالاسى - 1 421, تٷركٸستان وبلىسى - 1 406, الماتى قالاسى 1 120 وتباسىن قامتىدى.
وسى رەتتە قازاقستان مۇسىلماندارى دٸني باسقارماسىنىڭ قايىرىمدىلىق باعىتتا قولعا العان www.qurban2020.kz جوباسىنا بەلسەندٸ تٷردە اتسالىسىپ, مۇقتاجدىڭ مۇڭىن بٶلٸسٸپ, ساۋاپقا ٷلەس قوسقان بارشا ازاماتقا, سونداي-اق جەكەلەگەن كەسٸپورىندار مەن ۇيىمداردىڭ باسشىلارىنا ايرىقشا العىس ايتامىز.
اللا تاعالا جاساعان قايىرىمدىلىقتىڭ قايىرىن ٶزدەرٸڭٸزگە ەسەلەپ قايتارسىن دەپ تٸلەيمٸز.
