قۇرلىقتىق حوككەي ليگاسى اياسىندا ەلوردالىق «بارىس» بٷگٸن, 23 قاڭتاردا cىرت ايدىندا رەسەيدٸڭ «ۆيتياز» (پودولسك) كومانداسىمەن كەزدەستٸ, دەپ حابارلايدى "ۇلت اقپارات".
ەكٸ كوماندا تۋرنير كەستەسٸندە قاتارلاس كەلەدٸ. سوندىقتان ويىن تارتىستى بولاتىنى انىق ەدٸ. كەزدەسۋ بارىسىندا «ۆيتياز» كومانداسىنىڭ بەلسەندٸلٸگٸ ايقىن اڭعارىلىپ تۇردى.
العاشقى گولدى رەسەيلٸك حوككەيشٸ الەكساندر سيومين 6-مينۋتتا سوعىپ كەتتٸ. ودان كەيٸن «بارىس» حوككەيشٸسٸ لينۋس ۆيدەلل 8-مينۋتتا تارازى باسىن تەڭەستٸردٸ. ال 13-مينۋتتا دجاستين دەنفورت «ۆيتياز» كومانداسىن قايتادان العا شىعاردى.
ەكٸنشٸ كەزەڭدە «بارىس» ساپىنان ۆالەريي ورەحوۆ 24, داررەن ديتس 25-مينۋتتا گول سوعىپ كەتتٸ. رەسەيلٸك كلۋب حوككەيشٸسٸ دجاستين دەنفورت 29-مينۋتتا قايتادان تارازى باسىن تەڭەستٸردٸ.
ويىننىڭ 57-مينۋتىندا رەسەيلٸك زاحار بارداكوۆ «ۆيتياز» كلۋبىن العا شىعارسا, 59-مينۋتتا ەلوردالىق نيكيتا ميحايليس تارازى باسىن تەڭەستٸردٸ. نەگٸزگٸ كەزەڭ 4:4 ەسەبٸمەن اياقتالىپ, ويىن وۆەرتايمعا ۇلاستى. وۆەرتايمدا «بارىس» حوككەيشٸسٸ دجەسسي بلەكەر جەڭٸس شايباسىن سوعىپ كەتتٸ. وسىلايشا ەلوردالىق كلۋب قارسىلاسىن 5:4 ەسەبٸمەن تٸزە بٷكتٸردٸ.
ايتا كەتەيٸك, «بارىس» بٷگٸنگٸ قارسىلاسىن جەتٸ ويىن قاتارىنان جەڭٸپ كەلەدٸ. سوڭعى رەت «ۆيتياز» قازاقستاندىق كلۋبتى 2016 جىلدىڭ 2 جەلتوقسانىندا پودولسكٸدە وۆەرتايمدا 4:2 ەسەبٸمەن تٸزە بٷكتٸرگەن ەدٸ. نەتيجەسٸندە «بارىس» اتالعان قارسىلاسىنان قاتارىنان سەگٸزٸنشٸ مەرتە باسىم تٷسٸپ وتىر.
«بارىس» ەندٸ 26 قاڭتاردا ەلوردادا رەەسيدٸڭ «تراكتور» (چەليابينسك) كومانداسىن قابىلدايدى.
