امەريكالىق جازۋشى مارك تۆەننٸڭ تانىمال شىعارماسى «حانزادا مەن قايىرشى» رومانى قازاق تٸلٸنە اۋدارىلدى, – دەپ حابارلايدى «ۇلت اقپارات».
«فوليانت» باسپاسىنان جارىق كٶرگەن شىعارمانى بەلگٸلٸ جۋرناليست دينا يمامباي اۋدارعان.
رومانداعى نەگٸزگٸ وقيعا انگلييادا ٶربيدٸ. شىعارمادا XVI عاسىرداعى حالىقتىڭ تۇرمىس-تٸرشٸلٸگٸ مەن اقسٷيەكتەردٸڭ سارايداعى ٶمٸر سۋرەتتەلەدٸ.
لوندون شاھارىندا بٸر-بٸرٸنەن اۋمايتىن ەكٸ بالا دٷنيەگە كەلەدٸ. ونىڭ بٸرٸ ۋەلس حانزاداسى بولسا, ەكٸنشٸسٸ – كەدەي وتباسىنان شىققان توم كەنتي.
توم كەنتي پاتشا سارايىندا ٶمٸر سٷرۋدٸ اڭساسا, حانزادا ەركٸندٸكتٸ قالايدى. سٶيتٸپ بٸر كٷنٸ كٷتپەگەن جەردەن ولاردىڭ تٸلەگٸ ورىندالىپ, شيەلەنٸسكە تولى شىتىرمان وقيعالارعا تاپ بولادى.
«سٷپ-سٷيكٸمدٸ بالاقاي توم كەنتيدٸڭ باسىنان كەشكەن حيكاياسىن اۋدارىپ وتىرىپ, ناعىز ۆيزۋاليزاتسييا دەگەننٸڭ نە ەكەنٸن بۇرىنعىلار دا بٸلگەنٸن بايقادىم. تاقىر كەدەي وتباسىندا تۋعان توم پاتشا سارايىن, ناعىز حانزادانى بٸر كٶرسەم دەپ ارمانداپ, كٷندٸز ويىنان, تٷندە تٷسٸنەن شىقپاي جٷرٸپ اقىرى كورول سارايىنا تاپ بولادى, تٸپتٸ بٸراز كٷن حانزادا بولادى. كورولدەردٸڭ كيٸنۋ, تاماق ٸشۋ تسەرەمونييالارىن, مەرەكەلەرٸن اۋدارۋدا بٸراز قينالعانىمدى جاسىرمايمىن. مٷلدە بٶلەك حالىق, بٶلەك مەنتاليتەت قوي.
قىلمىس جاساعان ادامدى قيناۋلارى قازاققا ۇقسايدى ەكەن, سونىڭ بٸرٸ «كولوداعا وتىرعىزۋ» – ورتاسىنداعى ويىعىنان ادامنىڭ قىل مويىنىنا كيگٸزٸلٸپ ەكٸ جاعىنان بەكٸتٸلەتٸن, يىقتىڭ ٷستٸندە تۇراتىن اعاش تاقتا - «اجىرعى». ايتپاقشى, بۇل كٸتاپ ورىسشا نۇسقاسىنان اۋدارىلدى. جەنە دە ورىسشا اۋدارمانىڭ بارلىعى كەرەمەت دەگەن پٸكٸر دۇرىس ەمەسٸنە تاعى بٸر رەت كٶزٸم جەتتٸ, بٸرنەشە جەردە ماعىناسىن دۇرىس جەتكٸزبەگەنٸن بايقادىم», – دەيدٸ دينا يمامباي.
