بٷگٸن گرۋزييادا 2 مىڭنان استام ينتەرنەت-سايتقا كيبەرشابۋىل جاسالدى. ولاردىڭ اراسىندا مەملەكەتتٸك مەكەمەلەردٸڭ, سوتتاردىڭ, ٷكٸمەتتٸك ەمەس ۇيىمداردىڭ, باق-تار مەن جەكە كومپانييالاردىڭ سايتتارى بار. بۇل تۋرالى نوۆوستي-گرۋزيي اگەنتتٸگٸ حابارلادى.
حاكەرلەر گرۋزييا پرەزيدەنتٸ ەكٸمشٸلٸگٸنٸڭ www.president.gov.ge ۆەب-پورتالىن دا نىساناعا العان. ولار سايتتىڭ العاشقى بەتٸنە ميحايل سااكاشۆيليدٸڭ سۋرەتٸن ورنالاستىرىپ, استىنا اعىلشىن تٸلٸندە «مەن ورالامىن» (I’ll be back) دەپ جازىپ قويعان. قازٸر سايت مٷلدەم اشىلمايدى.
گرۋزييانىڭ ٷشٸنشٸ پرەزيدەنتٸ ميحايل سااكاشۆيلي 2013 جىلى ەل باسشىلىعىنداعى ەكٸنشٸ مەرزٸمٸنەن كەيٸن لاۋازىمىنان كەتكەن ەدٸ. سااكاشۆيلي مەرزٸمٸنٸڭ سوڭعى جىلىندا وپپوزيتسييالىق ميللياردەر بيدزينا يۆانيشۆيليدٸڭ «گرۋزين ارمانى» كواليتسيياسى پارلامەنتتٸك سايلاۋدا جەڭٸسكە جەتكەن بولاتىن. سودان بەرٸ سااكاشۆيلي قۇرعان «بٸرتۇتاس ۇلتتىق قوزعالىس» گرۋزيياداعى ەڭ ٸرٸ وپپوزيتسييالىق پارتييا بولىپ وتىر.
سااكاشۆيلي ۋكراينادا ساياساتپەن اينالىسىپ جٷرسە دە, ەلٸنە ورالاتىنى تۋرالى جيٸ ايتادى. بٸراق ونى «لاۋازىمىن اسىرا پايدالاندى» دەپ, گرۋزييا بيلٸگٸ سىرتتاي سوتتاپ جٸبەرگەن.
