قازاقستاندىقتار 43 250 تەڭگەگە ساتىپ العان نٶمٸرلەردٸ سىيعا تارتىپ, ساتا المايدى

فوتو: اشىق دەرەككٶز

قازاقستاندا 10 اەك ياعني 43 250 تەڭگەگە ساتىپ العان نٶمٸرلەرگە قاتىستى بٸرقاتار شەكتەۋ ەنگٸزٸلدٸ, دەپ حابارلايدى Ult.kz 31-ارنانىڭ “ينفورمبيۋرو” باعدارلاماسىنا سٸلتەمە جاساپ.

ەندٸ قازاقستاندىقتار ٶزٸنە ۇناعان قىمبات نٶمٸرلەردٸ سىيعا تارتىپ نەمەسە ساتا المايدى. 

"تاڭداپ الىنعان مەملەكەتتٸك نٶمٸردٸ يەسٸ تەك اتا-اناسىنا, بالاسىنا, نە رەسمي نەكەدەگٸ جۇبايىنىڭ عانا اتىنا اۋىستىرا الادى", – دەيدٸ ٸشكٸ ٸستەر مينيسترلٸگٸ.

ايتا كەتسەك, كٶلٸك بولماسا دا “ەدەمٸ” نٶمٸرگە ٶتٸنٸم بەرۋگە بولادى. ونى ساقتاۋ مەرزٸمٸ شەكتەلمەيدٸ. قۇزىرلى ورگاننىڭ دەرەگٸنشە, قازٸرگە دەيٸن تاڭدالعان نٶمٸرلەرگە جالپى 123 مىڭنان استام ادام ٶتٸنٸش كەلٸپ تٷسكەن. ەڭ جوعارى سۇرانىس الماتى قالاسىندا.

"تاڭداپ الىنعان مەملەكەتتٸك تٸركەۋ نٶمٸرٸ بەلگٸسٸن پايدالانۋ تەك ونىڭ يەسٸنە عانا رۇقسات ەتٸلەدٸ. سونداي-اق زاڭنامادا مەملەكەتتٸك تٸركەۋ نٶمٸرٸ بەلگٸسٸن بەلگٸلەنگەن تەرتٸپپەن يەسٸنٸڭ جاقىن تۋىستارىنا بەرە الادى. نەسيەگە العان كٶلٸكتەرگە نٶمٸر الۋ كەزٸندە كٶلٸك قۇرالىنىڭ يەسٸ كەپٸلدە تۇرعان بانكتەن تٸركەۋ كۋەلٸگٸن نەمەسە مەملەكەتتٸك تٸركەۋ نٶمٸرٸ بەلگٸسٸن اۋىستىرۋ تۋرالى رۇقسات قۇجاتىن ۇسىنۋى قاجەت", – ٸشكٸ ٸستەر مينيسترلٸگٸ ەكٸمشٸلٸك پوليتسييا كوميتەتٸنٸڭ اعا ينسپەكتورى اقتوتى بورانوۆا.