قازاقستاندىق جۇپ تۇڭعىش رەت رولان گارروستىڭ فينالىنا شىقتى

قازاقستاندىقتار الەكساندر بۋبليك پەن اندرەي گولۋبەۆ جۇپتىق سىندا رولان گارروس تۋرنيرٸنٸڭ فينالىنا شىقتى, دەپ حابارلايدى "ۇلت اقپارات".

قازاقستاندىق جۇپ جارتىلاي فينالدا يسپانييالىقتار پابلو اندۋحار – پەدرو مارتينەسپەن كٷش سىناستى.

سپورتتىق جولدارىندا 33 جاستاعى گولۋبەۆ پەن ودان ون جاس كٸشٸ بۋبليك بۇعان دەيٸن «ٷلكەن دۋلىعا» تۋرنيرلەرٸندە جۇپتىق سىندا وسىمەن ەكٸنشٸ رەت جارتىلاي فينالدا باق سىنادى. 

جەتٸ جىل بۇرىن گولۋبەۆ اۋسترالييالىق سەم گروتپەن بٸرگە رولان گارروس تۋرنيرٸنٸڭ جارتىلاي فينالىنا دەيٸن جەتٸپ, بولاشاق جەڭٸمپازدار جيۋلەن بەننەتو مەن ەدۋارد روجە-ۆاسسلەنگە 6:3, 3:6, 4:6 ەسەبٸمەن ەسە جٸبەردٸ.

بۋبليك تاعى بٸر قازاقستاندىق ميحايل كۋكۋشكينمەن بٸرگە 2020 جىلعى اۋسترالييا اشىق چەمپيوناتىنىڭ جارتىلاي فينالىندا بولاشاق چەمپيوندار, امەريكالىق رادجيۆ رام مەن ۇلىبريتانييالىق دجو سولسبەريدەن 6:4, 3:6, 4:6 ەسەبٸمەن ۇتىلىپ قالعان ەدٸ.

بۇل جولى يسپانييالىق جۇپ ماتچتى قارقىندى باستاپ, بٸرٸنشٸ پارتييادا بەت قاراتقان جوق – 6:1. 

ەكٸنشٸ سەتتە ەسەپ 4:4 بولعان مەزەتتە قازاقستاندىقتار برەيك جاساي بٸلدٸ. سوسىن بۋبليك دوپتى ٶتە سەتتٸ بەردٸ – 6:4.

ٷشٸنشٸ, شەشۋشٸ پارتييادا ەسەپ 3:3 بولعاندا, قازاقستاندىق جۇپ برەيك جاسادى. اقىرى گولۋبەۆ ماتچقا دوپ بەرگەندە, قازاقستاندىقتار جەڭٸستٸ جۇلىپ الدى – 6:4.

تارتىستى بەسەكە 1 ساعات 44 مينۋتقا سوزىلدى.

قازاقستاندىقتار فينالدا فرانتسييا اشىق چەمپيوناتىنىڭ 2-راكەتكالارى, كولۋمبييالىقتار حۋان-سەباستيان كابال – روبەرت فاراح نەمەسە كورت يەلەرٸ پەر-يۋگ ەربەر – نيكوليا مايۋ جۇپتارىنىڭ قاي جەڭگەنٸمەن باس جٷلدەنٸ ساراپقا سالادى.