2008 جىلى بەيجٸڭدە ٶتكەن وليمپيادا ويىندارىندا قازاقستاندىق تٶرت اۋىراتلەتتٸڭ دوپينگ سىنامالارىنان تىيىم سالىنعان زاتتار تابىلعان, - دەپ حابارلايدى Vesti.kz حالىقارالىق اۋىر اتلەتيكا فەدەراتسيياسىنىڭ (IWF) باسپاسٶز قىزمەتٸنە سٸلتەمە جاساپ. بۇل تۋرالى kaz.tengrinews.kz جازدى.
سونىمەن تىيىم سالىنعان زاتتار 2008 جىلعى بەيجٸڭدەگٸ وليمپيادا ويىندارىنىڭ كٷمٸس جٷلدەگەرٸ يرينا نەكراسوۆانىڭ (63 كەلٸگە دەيٸن), قولا جٷلدەگەرٸ مارييا گرابوۆەتسكايانىڭ (75 كەلٸدەن اسا), سونداي-اق ماييا مانەزا مەن ۆلاديمير سەدوۆتىڭ دوپينگ سىنامالارىنان تابىلعان.
ايتا كەتەيٸك, قازٸرگٸ ۋاقىتتا وسى تٶرت سپورتشى جارىستاردان ۋاقىتشا شەتتەتٸلدٸ.
سونداي-اق, حالىقارالىق اۋىر اتلەتيكا فەدەراتسيياسىنىڭ ٶكٸلدەرٸ سپورتشىلارعا قاتىستى تەرگەۋ جۇمىستارى اياقتالمايىنشا, ەشقانداي دا تٷسٸنٸك بەرمەيتٸنٸن ايتتى.
وسىعان دەيٸن دە ۆلاديمير سەدوۆتىڭ دوپينگ سىناماسىنان تىيىم سالىنعان زاتتار تابىلعان ەدٸ. 2006 جىلى سەدوۆ 2008 جىلدىڭ ماۋسىم ايىنا دەيٸن شەتتەتٸلگەن بولاتىن. ال بەيجٸڭدە ٶتكەن وليمپيادا ويىندارىندا سەدوۆ تٶرتٸنشٸ ورىن الدى.
ەسكە سالايىق, يليا يلين, سۆەتلانا پودوبەدوۆا, ماييا مانەزا جەنە زٷلفييا چينشانلونىڭ 2012 جىلعى وليمپياداداعى سىنامالارىن قايتا تەكسەرۋ بارىسىندا دوپينگتٸڭ بار ەكەندٸگٸ انىقتالعان. يليننٸڭ 2008 جىلعى وليمپياداداعى دوپينگ سىناماسىندا دا تىيىم سالىنعان زاتتار بار بولىپ شىقتى. بۇل سپورتشىلار سول وليمپيادا ويىندارىندا التىن مەدال العان ەدٸ.
