قازاقستاندا 370 مەديتسينا قىزمەتكەرٸنە كوروناۆيرۋس جۇققان. ونىڭ باسىم بٶلٸگٸ الماتى قالاسى (197) مەن نۇر-سۇلتان قالاسىندا (92). دەرٸگەرلەر اراسىندا جانساقتاۋ بٶلٸمٸندە جاتقاندار جوق. بۇل تۋرالى 15 سەۋٸردەگٸ بريفينگتە قازاقستان دەنساۋلىق ساقتاۋ مينيسترٸنٸڭ ورىنباسارى لەززات اقتاەۆا ايتتى.
مينيستردٸڭ ورىنباسارى ەلدە كەيٸنگٸ كٷندەرٸ ۆيرۋس جۇعۋ كٶرسەتكٸشٸ 12,9 پايىزعا ٶسكەنٸن ايتتى. اقتاەۆا "قازاقستاندا ۆيرۋس ينفەكتسيياسى شىرقاۋ شەگٸنە جەتتٸ. جٷز مىڭ ادامنىڭ ەربٸر جەتٸنشٸسٸنە ۆيرۋس جۇققان. سوندىقتان 20 سەۋٸرگە دەيٸن تەست جاساۋ كٶبەيەدٸ" دەپ مەلٸمدەدٸ.
دەنساۋلىق ساقتاۋ مينيسترٸنٸڭ ورىنباسارى قازاقستاندا 80 بالادان ۆيرۋس انىقتالعانىن, ولاردىڭ جاعدايى جاقسى ەكەنٸن ايتتى. سٶزٸنشە, ۆيرۋس جۇقتىرعان بالالاردىڭ اراسىندا جاڭا تۋعان بٸر سەبي بار. ۆيرۋس سەبي مەن اناسىنا تۋىسقانىنان جۇققان. سونداي-اق بٸر جاسقا تولماعان ەكٸ بالادان ۆيرۋس تابىلعان.
قازٸر قازاقستاندا بارلىعى 1290 ادامنان ۆيرۋس تابىلدى. 240 ادام دەرتتەن ايىقتى. 16 ادام قايتىس بولدى. دەنساۋلىق ساقتاۋ مينيسترلٸگٸنٸڭ مەلٸمەتٸنشە, اۋرۋحانادا جاتقان 21 ادامنىڭ جاعدايى اۋىر.
