قازاقستان ٷش التىن, بەس كٷمٸس, توعىز قولا مەدال جەڭٸپ الدى. جالپى كوماندالىق ەسەپتە 22-شٸ ورىن يەلەندٸك. مەدال سانى جٶنٸنەن رەكورد ورناتتىق. بۇعان دەيٸن اتلانتادا 11, سيدنەيدە 7, افينىدا 8, پەكيندە 13, لوندوندا 13 مەدال ەنشٸلەگەن بولاتىنبىز. بۇل جولى قورجىنعا 17 جٷلدە تٷستٸ.
وليمپيادانىڭ سوڭعى كٷنٸندە ەكٸ بوكسشىسى التىن مەدال العان ٶزبەكستان جالپى كوماندالىق ەسەپتە بٸزدٸ باسىپ وزىپ, 21-شٸ ورىنعا تۇراقتادى. الا تاقييالى اعايىندارىمىز 4 التىن, 2 كٷمٸس, 7 قولا مەدال جەڭٸپ العان.
قازاقستاننان نيجات راحىموۆ, دانييار ەلەۋسٸنوۆ, دميتريي بالاندين التىن السا, جازيرا جاپپارقۇل, ەلدوس سمەتوۆ, ۆاسيليي لەۆيت, ەدٸلبەك نييازىمبەتوۆ, گيۋزەل مانيۋروۆا كٷمٸس مەدالعا قول جەتكٸزدٸ. قولا جٷلدە العانداردىڭ قاتارىندا گالبادراح وتگونتسەتسەگ, فارحاد حاركي, كارينا گوريچەۆا, الەكساندر زايچيكوۆ, ولگا رىپاكوۆا, ەلميرا سىزدىقوۆا, ەكاتەرينا لاريونوۆا, يۆان دىچكو, داريعا شەكٸموۆا بار.
ايتا كەتەيٸك, وسى جىلعى وليمپيادا ويىندارىنا 28 سپورت تٷرٸنەن 206 مەملەكەت پەن بوسقىندار كوماندالارىنان 10 مىڭنان استام سپورتشى قاتىستى.
بايراقتى بەسەكەدە 306 مەدال جيىنتىعى ساراپقا سالىندى.
تٶرتجىلدىقتىڭ باستى دوداسىندا ەلٸمٸزدٸڭ نامىسىن 26 سپورت تٷرٸنەن 104 سپورتشى قورعادى.
سوڭعى ەكٸ وليمپيادا ويىندارىندا قىتايعا ەسە جٸبەرگەن اقش بۇل جولى قايتادان بٸرٸنشٸ ورىندى جەڭٸپ الدى. ەكٸنشٸ ورىنعا ۇلىبريتانييا سپورتشىلارى يە بولدى. ٷزدٸك ٷشتٸكتٸ قىتاي قورىتىندىلادى.
جالپى كوماندالىق ەسەپ
1). اقش – 121 (46 التىن, 37 كٷمٸس, 38 قولا)
2). ۇلىبريتانييا – 67 (27 التىن, 23 كٷمٸس, 17 قولا)
3). قىتاي – 70 (26 التىن, 18 كٷمٸس, 26 قولا).
بەك تٶلەۋوۆ
