Qazaqstan úsh altyn, bes kúmis, toǵyz qola medal jeńip aldy. Jalpy komandalyq esepte 22-shi oryn ielendik. Medal sany jóninen rekord ornattyq. Buǵan deiin Atlantada 11, Sidneide 7, Afinyda 8, Pekinde 13, Londonda 13 medal enshilegen bolatynbyz. Bul joly qorjynǵa 17 júlde tústi.
Olimpiadanyń sońǵy kúninde eki boksshysy altyn medal alǵan Ózbekstan jalpy komandalyq esepte bizdi basyp ozyp, 21-shi orynǵa turaqtady. Ala taqiialy aǵaiyndarymyz 4 altyn, 2 kúmis, 7 qola medal jeńip alǵan.
Qazaqstannan Nijat Rahymov, Daniiar Eleýsinov, Dmitrii Balandin altyn alsa, Jazira Japparqul, Eldos Smetov, Vasilii Levit, Ádilbek Niiazymbetov, Giýzel Maniýrova kúmis medalǵa qol jetkizdi. Qola júlde alǵandardyń qatarynda Galbadrah Otgontsetseg, Farhad Harki, Karina Goricheva, Aleksandr Zaichikov, Olga Rypakova, Elmira Syzdyqova, Ekaterina Larionova, Ivan Dychko, Dariǵa Shákimova bar.
Aita keteiik, osy jylǵy Olimpiada oiyndaryna 28 sport túrinen 206 memleket pen bosqyndar komandalarynan 10 myńnan astam sportshy qatysty.
Bairaqty básekede 306 medal jiyntyǵy sarapqa salyndy.
Tórtjyldyqtyń basty dodasynda elimizdiń namysyn 26 sport túrinen 104 sportshy qorǵady.
Sońǵy eki Olimpiada oiyndarynda Qytaiǵa ese jibergen AQSh bul joly qaitadan birinshi oryndy jeńip aldy. Ekinshi orynǵa Ulybritaniia sportshylary ie boldy. Úzdik úshtikti Qytai qorytyndylady.
Jalpy komandalyq esep
1). AQSh – 121 (46 altyn, 37 kúmis, 38 qola)
2). Ulybritaniia – 67 (27 altyn, 23 kúmis, 17 qola)
3). Qytai – 70 (26 altyn, 18 kúmis, 26 qola).
Bek Tóleýov
